Նախաձեռնութեամբ եւ կազմակերպութեամբ Ասորական միութիւն կուսակցութեան, շաբաթ, 29 ապրիլին Զահլէի մէջ ոգեկոչուեցաւ 108-ամեակը Օսմանեան կայսրութեան կողմէ գործադրուած հաւաքական սպանդին` ասորիներուն, հայերուն եւ ընդհանրապէս արեւելքի ու յատկապէս Լեռնալիբանանի մարոնիներուն նկատմամբ:
Քաղաքական եւ հոգեւոր պաշտօնական անձնաւորութիւններու կարգին, «Արարատ լեռէն եւ երկու գետերէն մինչեւ Լեռնալիբանան` մէկ սուր» խորագիրը կրող ձեռնարկին ներկայ էին նաեւ ՀՅԴ «Արամ» կոմիտէի անդամներ եւ Պեքաայի շրջանի հոգեւոր տեսուչ Անանիա ծ. վրդ. Գուճանեան:
Այս առիթով արտասանուեցան խօսքեր` ՀՅԴ «Արամ» կոմիտէին, Մարոնիական ասորական միութեան, Ասորական միութիւն կուսակցութեան կողմէ: Բոլորն ալ հաստատեցին, որ միեւնոյն թուրը ճօճուեցաւ Արարատ լեռէն մինչեւ Լեռնալիբանան` պարտադրելու մէկ ինքնութիւն եւ մէկ կրօն, դիտել տալով, որ թրքական պետութիւնը տակաւին կը շարունակէ ժխտել իր կատարած ոճիրները, որոնց վերաբերող բազում փաստեր գոյութիւն ունին, եւ զորս ընդունած են բազմաթիւ մեծ պետութիւններ: Խօսք առնողները հաստատեցին, որ պիտի շարունակեն իրենց պայքարը, մինչեւ որ Թուրքիա ընդունի իր յանցագործութիւնը եւ հատուցում կատարէ, որպէսզի մարդկային պատմութեան մէջ գործուած ահաւոր ցեղասպանութիւնը չկրկնուի:
ՀՅԴ «Արամ» կոմիտէին անունով Խաժակ Բալուլեան լուսարձակի տակ առաւ Թուրքիոյ ազգաջինջ քաղաքականութիւնը, որուն թիրախ դարձան շատեր, յատկապէս` հայեր, ասորիներ, քաղդէացիներ եւ այլն: Ան շեշտեց, որ այս բոլորին նպատակը մէկ է` ազգերը բնաջնջել եւ անոնց գոյութեան վերջ տալ, բայց եւ այնպէս թրքական ոճրային ծրագիրը ձախողեցաւ, եւ 108 տարիներ ետք այդ ազգերը ոչ միայն պահած են իրենց գոյութիւնը, այլ նաեւ` իրենց մշակոյթը, կրօնը, լեզուն եւ ազգային արժէքները:
Խ. Բալուլեան նշեց, որ ժամանակի թաւալումին հետ իրերայաջորդ սերունդներ կը շարունակեն կառչած մնալ իրենց Դատին, իսկ կատարուած սպանդները կը մնան դաջուած մարդկութեան ճակատին` իբրեւ ամօթի նշան: Ան շեշտեց, որ ժամանակը եկած ու անցած է նոյնիսկ արդար պատիժը տալու ոճրագործին, որպէսզի ապագային նման սպանդներ չկրկնուին:
Մերօրեայ իրադարձութիւնները լուսարձակի տակ առնելով` ան ըսաւ, որ Թուրքիա այսօր եւս իր դրացի եւ դաշնակից Ազրպէյճանի հետ կը շարունակէ նոյն ոճրային քաղաքականութիւնը` Արցախի մէջ ոճիրներ գործելով, մեծաթիւ արցախցիներ զրկելով իրենց պապենական հողերէն, ամիսներ շարունակ Արցախը շրջափակուած պահելով եւ մարդկային աղէտի պատճառ դառնալով: Սակայն կրկին, ցաւ ի սիրտ, միջազգային ընտանիքը կը բաւարարուի յայտարարութիւններով, առանց ազդու քայլերու դիմելու:
Խաժակ Բալուլեան շեշտեց, որ հակառակ ամէն ինչի` չենք յուսահատիր, չենք յանձնուիր, իսկ ասոր փաստը այն է, որ կը շարունակուին ոգեկոչման ձեռնարկները, պահանջատիրական արտայայտութիւններն ու նախաձեռնութիւնները: Ըստ անոր, նման հաւաքներ առիթ են վերանորոգելու գոյատեւման ուխտը, վերահաստատելու, որ հատուցման պահանջը կը շարունակէ առկայ մնալ, այնքան ատեն որ կան իրաւատէրեր, որոնք չեն զիջած:
Խօսքեր առին նաեւ Ասորական միութիւն կուսակցութեան փոխնախագահ Լէյլա Լըթէյ, Մարոնիական ասորական միութեան նախագահ Ամին Սքանտար եւ Ասորական միութիւն կուսակցութեան միջազգային նախագահ Իպրահիմ Մրատ:
