Եվրոպայի Ցեղապաշտության և անհանդուրժողականության դեմ պայքարի հանձնաժողովը հայտնել է, թե Թուրքիայում չկան խտրականությունն արգելող ու ցեղապաշտության դեմ պատիժներ նախատեսող օրենքներ: Թուրքիայի մասին զեկույցում Եվրոպայի Ցեղապաշտության և անհանդուրժողականության դեմ պայքարի հանձնաժողովը դեմ է արտահայտվել նաև դպրոցներում տրվող «Ի~նչ երջանիկ է նա, ով ասում է` թուրք եմ» երդմանը և այդ խոսքերը որակել որպես «խտրական արտահայտություններ»: Զեկույցում արձանագրվել է նաև, որ թեև Թուրքիայում ցեղապաշտության և անհանդուրժողականության դեմ պայքարի հարցում որոշ առումներով առաջընթաց է գրանցվել, սակայն ոչ մի բարելավում չի եղել «քրդերի, հոռոմների և էմիգրանտության համար դիմումով հանդես եկածների» դրության տեսանկյունից, և որ մտահոգիչ է կրոնական փոքրամասնությունների դեմ ցուցաբերվող խտրականությունը:
Զեկույցում համառոտ կերպով արտահայտվել են հետևյալ տեսակետները.
- Ուրախալի են կառավարության` քուրդ, հոռոմ, ալևի և ոչ մուսուլման կրոնական փոքրամասնությունների խնդիրների լուծման ուղղությամբ ձեռնարկած «քայլերը»:
- Սակայն թուրքական օրենսդրության մեջ դեռ ցեղապաշտության ու խտրականության դեմ մեկնաբանություններ չկան, և թուրքական օրենքները չեն նախատեսում ռասիզմի դեմ սահմանված պատիժներ:
- Փոքրամասնական խմբերի անդամները, եթե անգամ իրենց տեսակետներն արտահայտում են խաղաղասեր կերպով, այնուամենայնիվ պատժվում են դրանց համար: Նրանց արտահայտած խոսքերը Թուրքիայում դատապարտում են` հիմք ընդունելով ահաբեկչության դեմ պայքարի օրենքի դրույթը:
- Ոչ մուսուլման երեխաները կրթական համակարգում ուսուցիչների և դպրոցական դասագրքերի հետ առնչվող խնդիրներ են ունենում:
Զեյնել Լյուլե
