Պատրիարքարանի երդիքին տակ շնորհաւորական ընդունելութիւն՝ համայնքային տխուր անդրադարձներով

Ս. Ծննդեան տօնին առիթով Ս. Պատարագ մատուցուած է նաեւ Հաթայ նահանգի Իսքենտերուն քաղաքի Ս. Քառասուն Մանկանց եկեղեցւոյ մէջ

«ՄԱՐՄԱՐԱ» – Երէկ, 6 Յունուարին, մեր ժողովուրդի համայն զաւակները դարձեալ ջերմեռանդօրէն զիրար կը շնորհաւորէին, գոչելով պատգամը որ կը հնչէ դարերէ ի վեր՝ «Քրիստոս ծնաւ ու յայտնեցաւ։ Ձեզ եւ մեզ մեծ աւետիս»։

Քրիստոսի Յայտնութեան տօնը դարձեալ մեր հաւատացեալները հմայեց իրենց թաղին եկեղեցիներուն մէջ մատուցուած Ս. Պատարագներով։ Հոն ուր եկեղեցի մը կը գործէր, հոն էր մեր ժողովուրդը, որ հակառակ աշխարհիկ կեանքէ եկած աննպաստ պայմաններու, դեռ հաւատարիմ կը մնայ իր կրօնական աւանդութիւններուն եւ այդ աւանդութիւններուն մէջ կը փնտռէ իր ինքնութեան գոյապահպանումը։

Գումգաբուի Աթոռանիստ Մայր Եկեղեցւոյ մէջ պատարագեց Պատրիարքական Ընդհանուր Փոխանորդ Արամ Սրբազան, Շահան Սրբազան՝ Սկիւտարի Ս. Խաչ, Սահակ Սրբազան՝ Սամաթիոյ Ս. Գէորգ եկեղեցւոյ, Թաթուլ Հայր Սուրբ՝ Ֆէրիգիւղի Ս. Վարդանանց, Զաքէոս Հայր Սուրբ՝ Գուրուչէշմէի Երեւման Ս. Խաչ եկեղեցւոյ մէջ հաւատացեալներուն փոխանցեցին Ս. Ծննդեան տօնի աւետիսն ու պատգամը։

Կէսօրէ ետք Գումգաբուի Մայր եկեղեցւոյ Պէզճեան Ամիրա սրահին մէջ, Պատրիարքական Ընդհանուր Փոխանորդ Գերշ. Տ. Արամ Արք. Աթէշեանի գլխաւորութեամբ, մասնակցութեամբ Շահան, Սահակ Սրբազաններու, Թաթուլ եւ Զաքէոս Ծ. Վարդապետիներու ու Զատիկ Հայր Սուրբի եւ Քահանայից ամբողջ Դասուն, շնորհաւորական ընդունելութիւն մը սարքուած էր, որուն ներկայութիւն բերին գլխաւորաբար քոյր Քրիստոնեայ եկեղեցիներու եւ յարանուանութեանց բարձրաստիճան ներկայացուցիչներ։

Այսպէս, շնորհաւորական այցելութեան եկած էին Յունաց Տիեզերական Պատրիարք Պարթոլոմէոս Սրբազան, Հայ Կաթողիկէ համայնքէն՝ Գէորգ Արք. Խազումեան Սրբազան, Հայր Յակոբոս Վրդ. Չօփուրեան, Սուրիանի Ուղղափառ Եկեղեցիէն Եուսուֆ Չէթին, Ասորի Կաթողիկէ Եկեղեցիէն Եուսուֆ Սաղ։

Շնորհաւորական այցելութեան եկած էին նաեւ Շիշլիի Քաղաքապետ Մուսթաֆա Սարըկիւլ, ընկերակցութեամբ փոխ-քաղաքապետ Վազգէն Պարընի, Պաքըրգիւղի Քաղաքապետ Աթէշ Իւնալ Էրզէն, Կղզիներու նախկին քաղաքապետ Չօշքուն Էօզտէն եւ Ա-Քէ-Փէ կուսակցութենէն պատուիրակութիւն մը եւ այլ պատասխանատուներ։

Այցելութեան մեծաթիւ ներկայութիւն բերած էին Ս. Փրկիչ Ազգ. Հիւանդանոցի գլխաւորութեամբ, մեր համայնքային եւ մեր թաղային մարմիններու Ատենապետներն ու Ներկայացուցիչները, Դպրաց Դասերու եւ Սանուց Միութիւններու անդամներ եւ հաւատացեալ ազգայիններ։

Հաւաքոյթը բացաւ Արամ Սրբազան, որ շնորհակալութիւն յայտնեց ներկայ հիւրերուն, որոնք յարգած էին հայ եկեղեցւոյ այս մեծագոյն տօնը եւ հաճած էին շնորհաւորութեան փութալ։ Արամ Սրբազան ապա մաղթեց որ Ս. Ծննդեան այս տօնը խաղաղութիւն պարգեւէ համայն մարդկութեան եւ եղբայրական մթնոլորտի մէջ անդորր համակեցութիւն ստեղծէ։ Ներկաներուն խօսք ուղղեց նաեւ Յունաց Պարթոլոմէոս Սրբազան, որ շնորհաւորելէ ետք հայ համայնքի այս տօնը, անդրադարձաւ Որդւոց Որոտման Եկեղեցւոյ եւ Մեսրոպ Մութաֆեան Մշակութային Կեդրոնի բացման իրողութեան եւ իր գոհունակութիւնը յայտնեց։ Արտայայտուեցան կարգաւ Ասորիներու առաջնորդ՝ Եուսուֆ Չէթին, Եուսուֆ Սաղ եւ Հայ Կաթողիկէ Համայնքէն՝ Խազումեան Սրբազան, որոնք բոլորն ալ իրենց շնորհաւորութիւնները ուղղեցին ներկաներուն։

Այնուհետեւ, Աթէշեան Սրբազան ներկայ հիւրերուն շնորհակալութիւն յայտնելէ ետք, համայնքի ներկայացուցիչներուն տեղեկացուց որ հիւրերու մեկնումէն ետք պիտի ուզէ խօսիլ անոնց հետ, համայնքի մէջ առկայ հարցերու մասին։

Հիւրերու մեկնումէն ետք, Արամ Սրբազան նախ յայտնեց որ Որդւոց Որոտման Եկեղեցին թէեւ վերանորոգուած է, սակայն տակաւին կարիք կայ յաւելեալ գումարի, որպէսզի վերջնականապէս լրանան պակասները։ Այնուհետեւ հարց տուաւ թէ համայնքային հարցերու մասին արտայայտուիլ փափաքող կա՞յ։ Առաջին խօսքը խնդրեց ազգային դէմքերէն Մելքոն Գարաքէօսէ, որ ջղային տրամադրութեամբ, խիստ ոճով եւ նուաստացուցիչ խօսքերով, թերթի մը կտրօնը առած ի ձեռին, քննադատութիւններ ուղղեց Պալաթի ընտրութիւններուն եւ Պէյօղլուի Թաղային Խորհուրդի կողմէ դատավարութիւններու կապակցութեամբ որդեգրուած ընթացքի մասին։ Այնուհետեւ իր բարկութեան սլաքները տեղացուց նաեւ Գանտիլլիի Ս. Երկոտաստան Եկեղեցւոյ Թաղային Խորհուրդի Ատենապետ Տիգրան Գէորգեանի վրայ, յայտնելով որ այս Եկեղեցւոյ Թաղային Խորհուրդի ընտրութիւնները եւս կատարուած են ապօրէն ձեւով։ Որպէս ինքնարդարացումի իրաւունք, այս մասին խօսք պահանջեց նաեւ Տիգրան Գէորգեան, որ հանդարտ ոճով, բացատրութիւններ տուաւ իր կատարած իրագործումներուն մասին, մասնաւորաբար Թօփգաբուի Լեւոն Վարդուհեան Վարժարանէ ներս, փաստեր պահանջեց Գանտիլլի մէջ իրեն վերագրուած ապօրէն մեղադրանքներու առընչութեամբ եւ իր խօսքերը աւարտեց, յայտնելով որ բոլոր այն անարգանքերը, որոնք Մելքոն Գարաքէօսէի կողմէ ուղղուեցան իրեն, նոյնութեամբ կը վերադարձնէ դարձեալ Մելքոն Գարաքէօսէի։

Այս առիթով մէկ քանի անձեր եւս ունեցան արտայայտութիւններ, յորդորելով որ Կեդրոնական մարմին մը կազմուի եւ ամէն ազգային զօրավիգ կանգնի Պատրիարքարանին եւ այս գծով է որ լուծում գտնեն համայնքային մեր հարցերը։

Պատրիարքական Աթոռի ներկայացուցիչներու դիմաց կատարուած այս յուզիչ եւ անարգական ելոյթները, մասնաւորաբար Ս. Ծննդեան տօնի առիթով, պատճառ դարձան որ ելեկտրականացած մթնոլորտ ստեղծուի։ Վիճաբանութիւնները սրահէն դուրս, պարտէզին մէջ եւս շարունակուեցան բարձրաղաղակ գոռում գոչումներով եւ մէկզմէկու դէմ մեղադրանքներով։

Ներկաները այս անհաճոյ մթնոլորտին մէջ շնորհաւորեցին մեր հոգեւորականները, հիւրասիրուեցան քոնիկակով եւ տուրմով, մէկմէկ նուռ ստացան եւ մեկնեցան։

Leave a Reply

Your email address will not be published.