«Պայտընի հեռաձայնը կարեւոր չէ կառավարութեան համար, Թուրքիան այլեւս պիտի չզիջի» կ՛ըսէ Քալըն

Անգարան ոչ մէկ մտահոգութիւն կամ անհանգստութիւն ունի այն առնչութեամբ, թէ Միացեալ Նահանգներու նախագահ Ճօ Պայտըն տակաւին չէ խօսած իր թուրք պաշտօնակիցին հետ: Այս մասին «Հապեր Կլոպըլ» պատկերասփիւռի կայանի հետ հարցազրոյցի ընթացքին յայտարարած է Թուրքիոյ նախագահի խորհրդական Իպրահիմ Քալըն` աւելցնելով. «Պայտընի հեռաձայնը կարեւոր չէ կառավարութեան համար, Թուրքիան այլեւս պիտի չզիջի»:

«Իմ խօսքերս կրնան քիչ մը կարծր ըլլալ, սակայն ատիկա (Պայտընի հետ հաղորդակցութեան բացակայութեան մասին քննարկումը) ինծի կը յիշեցնէ թերարժէքութեան բարդոյթ, որ կար նախորդ վարչակազմերուն մէջ», ըսած է Քալըն:

Անոր համաձայն, Միացեալ Նահանգներու հետ Թուրքիոյ յարաբերութիւնները միշտ դէպի անկում գացած են:

«Պարաք Օպամայի օրերուն Ուաշինկթըն սկսած է աջակցիլ սուրիական քրտական խումբերուն, որոնց Թուրքիան ահաբեկչական կը նկատէ, մինչդեռ Տանըլտ Թրամփը պատժամիջոցներ հաստատած է Ամերիկայի Հակառակորդները պատժամիջոցներու ճամբով դիմակայելու օրէնքի (ՔԱԱԹՍԱ) ծիրին մէջ իր առջեւ գտնուող «Էս-400» հակաօդային պաշտպանութեան համակարգին պատճառով», նշած է Քալըն:

https://www.aztagdaily.com/archives/502520