Ֆրանսայի արտաքին գործոց նախարար Ժան Իվ Լը Տրիան իր գերմանացի եւ լեհ պաշտօնակիցներուն հետ հանդիպումէն ետք յայտարարած է, որ Թուրքիոյ մնայուն սադրիչ գործողութիւնները անթոյլատրելի են: Այս մասին կը հաղորդէ «Լը Ֆիկարօ»-ն:
«Պէտք է նշել, որ Թուրքիան մշտապէս սադրիչ գործողութիւններու կը ձեռնարկէ, ինչ որ անթոյլատրելի է: Մենք կ՛ուզենք, որ Անգարան յստակացնէ իր դիրքորոշումը», ըսած է նախարարը` մեկնաբանելով Թուրքիոյ գործողութիւնները Միջերկրական ծովու արեւելեան մասին մէջ, մասնաւորաբար այն փաստը, որ թրքական նաւը կազի հետախուզման համար վերադարձած է Յունաստանի տարածքային ջուրեր:
Անոր համաձայն, թէեւ Ֆրանսան կարեւոր կը նկատէ Թուրքիոյ հետ երկխօսութիւնը, սակայն պատրաստ է ուժերու համարժէք հաւասարակշռութիւն հաստատել Անգարայի հետագայ սադրանքներուն պարագային: «Այդ պատճառով գնդակը կը գտնուի թրքական կողմին մէջ», աւելցուցած է ֆրանսական դիւանագիտութեան պետը:
Գերմանիոյ արտաքին գործոց նախարար Հայքօ Մաաս իր կարգին նշած է, որ թրքական կողմը մտածելու համար մէկ շաբաթ ունի, այլապէս Եւրոպական Միութեան ղեկավարներու` դեկտեմբերին նախատեսուած յաջորդ վեհաժողովին Անգարայի դէմ կրնան պատժամիջոցներ հաստատուիլ:
Յիշեցնենք, որ Թուրքիոյ գործողութիւնները դատապարտած է նաեւ Հայաստանը, որ բարեկամական յարաբերութիւններ ունի Յունաստանի հետ:
Նշենք, որ Յունաստանի արտաքին գործոց նախարար Նիքոս Տենտիաս այսօր կ՛այցելէ Հայաստան:
Horizonweekly.ca
Leave a Reply