Չնայած ԱՄՆ նախագահ Դոնալդ Թրամփի հավաստիացումներին, որ ինքն ու իր թուրք գործընկերը «շատ լավ ընկերներ են», Սպիտակ տանը նրանց հանդիպումը չի կարողացել լուծել խնդիրը, որն այդքան ուժգին սրել էր ՆԱՏՕ-ի երկու դաշնակիցների միջեւ հարաբերությունները, փոխանցում է AP-ն:
Թրամփն ու Էրդողանը հանդիպումն ավարտել են՝ համաձայնության չհասնելով ռուսական Ս-400 համակարգերը գնելու եւ տեղադրելու Թուրքիայի որոշման վերաբերյալ: Սա ՆԱՏՕ-ի անվտանգության համար այնպիսի սպառնալիք է ստեղծում, որ ԱՄՆ-ն կասեցրել էր Թուրքիայի մասնակցությունը F-35 կործանիչների արտադրության բազմազգ ծրագրին:
Թուրքիան քննադատության է ենթարկվել նաեւ քրդերի վրա հարձակվելու նպատակով Սիրիա ներխուժելու պատճառով, որոնք ԱՄՆ-ի հետ մարտնչել են «Իսլամական պետության» դեմ: Դրանից բացի, Թուրքիային քննադատել են քաղաքական ընդդիմախոսներին, լրագրողներին եւ այլոց բռնաճնշումների ենթարկելու համար:
Թրամփը հայտարարել է, որ Թուրքիայի կողմից ռուսական ՀՕՊ համակարգերի գնումը «լուրջ խնդիրներ» է ստեղծում, բայց հույս ունի, որ դրանք կարող են լուծվել: Նա հայտնել է, որ այս հարցը քննարկել է Էրդողանի հետ եւ պետքարտուղար Մայք Պոմպեոյին եւ մյուս խորհրդականներին խնդրել է աշխատել այս խնդրի վրա:
Leave a Reply