Ուաշինկթըն մերժած է Թուրքիոյ առաջարկը. «Տնտեսական ճնշումներու նպատակը Թուրքիան եւ Թուրք ժողովուրդը ծունկի բերելն է» կ՛ըսէ Էրտողան

Թուրքիոյ նախագահ Ռեճեփ Թայիփ Էրտողան, անդրադառնալով երկրին մէջ շարունակուող տնտեսական ճգնաժամին, յայտարարած է, թէ արտաքին ուժերը այս ձեւով կ՛ուզեն «ծունկի բերել» թուրք ժողովուրդը: Այս մասին կը հաղորդէ «Թի.24» կայքը:

Թուրքիոյ նախագահը նաեւ շեշտած է, որ ատիկա «պարզապէս յարձակում է թրքական դրօշին դէմ»:

«Անոնց նպատակն է ծունկի բերել Թուրքիան եւ թուրք ժողովուրդը, պատանդ պահել զանոնք», ըսած է Էրտողան` Ատհայի տօնին առիթով արտասանած խօսքին մէջ:

Միւս կողմէ, ամերիկեան «Ուոլ Սթրիթ Ճըռնըլ» օրաթերթը, յղում կատարելով իր աղբիւրին, հաղորդեց, որ Միացեալ Նահանգներ մերժած են թրքական «Հալքպանք» դրամատան դէմ հետաքննութիւնը դադրեցնելու առաջարկը եւ մտադիր չեն զայն դադրեցնելու:

Օրաթերթին համաձայն, Անգարա խոստացած է վերցնել ամերիկացի պատուելի Էնտրիւ Պրանսընի դէմ մեղադրանքները, եթէ Միացեալ Նահանգներ հրաժարին պատժել թրքական դրամատունը` Իրանի դէմ պատժամիջոցները ոտնահարելուն համար:

http://www.aztagdaily.com/archives/405965