Անդրանիկ Իսպիրեան. «Թուրքիայում ընտրութիւններին մասնակցող ուժերը չեն անդրադառնայ ՀՀ-ի հետ յարաբերութիւնների կարգաւորման գործընթացին»

Թուրքիայում նախագահ Էրդողանի օրօք ստեղծւած իրավիճակը մեծ դժգոհութիւն է առաջացրել այնտեղի հասարակութեան բոլոր շերտերում: «Tert.am»-ի հետ զրոյցում ներկայացնելով Թուրքիայի ներքաղաքական իրավիճակը եւ վերլուծելով նախագահական եւ խորհրդարանական ընտրութիւններին մասնակցող ուժերի հնարաւորութիւնները` այսպէս ասաց թուրքագէտ Անդրանիկ Իսպիրեանը:

«Alikonline.ir» – Թուրքիայում նախագահ Էրդողանի օրօք ստեղծւած իրավիճակը մեծ դժգոհութիւն է առաջացրել այնտեղի հասարակութեան բոլոր շերտերում: «Tert.am»-ի հետ զրոյցում ներկայացնելով Թուրքիայի ներքաղաքական իրավիճակը եւ վերլուծելով նախագահական եւ խորհրդարանական ընտրութիւններին մասնակցող ուժերի հնարաւորութիւնները` այսպէս ասաց թուրքագէտ Անդրանիկ Իսպիրեանը:

«Նոյնիսկ իշխանական վերնախաւում արդէն իսկ սկսել են յոգնել Էրդողանի բռնապետական մեթոդներից, բազմաթիւ պատգամաւորներ, նախարարներ այս իրավիճակից յոգնել են»,- ասաց նա:

Թուրքագէտը նկատեց, որ Թուրքիայի հասարակութիւնն արդէն սովորել էր հէնց Էրդողանի կառավարման առաջին տարիներին եղած կայունութեանը, հիմա սակայն դժգոհում են ե՛ւ տնտեսական խնդիրներից, ե՛ւ երկրի անհանգիստ վիճակից:

Խօսելով սպասւող քաղաքական ընտրութիւններում առաջադրւած ուժերի մասին՝ Իսպիրեանը նշեց, որ ընդդիմութիւնը, հասկանալով, որ միայնակ չի կարող պայքարել, որոշել է համախմբւել:

Յիշեցնենք, որ Թուրքիայում ընտրութիւններին ընդառաջ դաշինք է կազմւել երկրի գլխաւոր ընդդիմադիր ուժը համարւող Ժողովրդահանրապետական կուսակցութեան, Մերալ Աքշեների Լաւ կուսակցութեան, ինչպէս նաեւ՝ երկրում գործող Դեմոկրատական ու Երջանկութիւն կուսակցութեան միջեւ։

Ընդդիմադիր Ժողովուրդների դեմոկրատական կուսակցութեան թեկնածուն այդ կուսակցութեան նախկին համանախագահ, 2016 թւականի նոյեմբերից կալանքի տակ գտնւող Սելահաթդին Դեմիրթաշն է, ում մինչեւ 5 տարւայ ազատազրկում է սպառնում:

Թուրքիայի իշխող Արդարութիւն եւ զարգացում կուսակցութեան նախագահի թեկնածուն գործող նախագահ Ռեջեբ Թայիբ Էրդողանն է: Վերջինիս աջակցում է նաեւ Ազգայնական շարժում կուսակցութիւնը:

Անդրանիկ Իսպիրեանի խօսքով՝ դեռ միանշանակ չի կարելի ասել, որ «Ազգայնական շարժում» կուսակցութեան հետևորդներն իրենց ձայնը ընտրութիւններին կը տան Էրդողանին:

«Այդ մասին փաստում է այն, որ այդ կուսակցութիւնից պարբերաբար մարդիկ հեռանում են, եւ հեռանում են, օրինակ, կուսակցութեան վարչութեան անդամներ, քաղաքային խորհրդի անդամներ»,- ասաց նա:
Թուրքագէտի նկատառմամբ՝ Թուրքիայում սպասւող քաղաքական ընտրութիւններին միակ խարիզմատիկ գործիչն Էրդողանն է:
Ընդդիմադիր ուժերից Ժողովրդահանրապետական կուսակցութիւնից առաջադրւած  Մուհարրեմ Ինջեին եւ Լաւ կուսակցութեան առաջնորդ Մերալ Աքչենէրը՝ ազգայնական առաջնորդները, ըստ Անդրանիկ Իսպիրեանի,  հայ համայնքի եւ Հայաստանի համար նպաստ բերողներ չեն:

«Հայերի դէպքում ամենայարմար տարբերակը «Ժողովրդների դեմոկրատական» քրդական կուսակցութիւնից առաջադրւած Դեմիրթաշն է, ում նախագահ ընտրւելը հաւանական չէ»,- ասաց նա:

Այս պահին բոլոր լծակները երկրի ներկայիս նախագահ Էրդողանի ձեռքին են, եւ դրա հետ մէկտեղ, չնայած երկրում առկայ ժողովրդի դժգոհութեան աճին՝ «Արդարութիւն եւ զարգացում» կուսակցութիւնն ունի կայուն եւ մեծ ընտրազանգւած:

«Մարդիկ ցանկանում են կայունութիւն: Գիտեն՝ եթէ փոփոխութիւն լինի, ապա դէպի վատը կը լինի: Այդ պատճառով համակերպւած են ներկայիս վիճակի հետ: Եթէ տնտեսական խնդիրներն աւելի խորանան, անկայունութիւնը մեծանայ, ապա գուցէ ժողովրդի մէջ առաջանայ ցանկութիւն՝ իշխանութիւնը փոխելու»,- ասաց նա:

Էրդողանը, ըստ թուրքագէտի, կարողանում է Թուրքիայի՝ տարածաշրջանային գործօն լինելն օգտագործել ի շահ իրեն: «Աֆրինի գործողութիւններն էլ դրա մասին են վկայում․ պատերազմական վիճակը մարդկանց ուշադրութիւնը ներքին խնդիրներից շեղում է դէպի թշնամին: Դա Էրդողանի դէպքում աշխատում է»,- ասաց նա:

Հայկական հարցը, ըստ Անդրանիկ Իսպիրեանի՝ մշտապէս խանգարել է Թուրքիայի իշխանութիւններին: Հիմա էլ, նրա կարծիքով, ընտրութիւններում հնարաւոր յաջողութեան հասնող կուսակցութիւնները չեն անդրադառնայ Հայաստանի հետ յարաբերութիւնների կարգաւորման գործընթացին:

«Չմոռանանք, որ հայ-թուրքական յարաբերութիւնների կարգաւորման առաջին նախաձեռնութիւններից յետոյ Թուրքիայի «Արդարութիւն եւ զարգացում» կուսակցութեան վարկանիշն իջել էր: Արդիւնքում Էրդողանը ոչ միայն դադարեցրեց կարգաւորման գործընթացը, այլ նաեւ նախաձեռնեց Հայաստանի նկատմամբ թշնամանք առաջացնող քաղաքականութիւն»,- յիշեցրեց նա:

Ի վերջոյ, հայ-թուրքական յարաբերութիւնների կարգաւորում, թուրքագէտի նկատառմամբ, հնարաւոր է միայն աշխարհաքաղաքական գործընթացների փոփոխութեամբ։

«Երբ նրանք հասկանան, որ, օրինակ, հայ-թուրքական սահմանը չբացելը վնասում է իրեն կամ հակառակը՝ բացելը մեծ օգուտ է իր համար, ապա կը սկսեն Հայաստանի հետ յարաբերութիւնների կարգաւորման գործընթաց: Իսկ այս պահին նման հեռանկարներ չկան: Եւրոպան դրանով մտահոգւած չէ, մնում է՝ Ռուսաստանն ինչ-որ բան անի»,- ասաց նա:

Alikonline.ir