Մենք միայն Արամ Աթեշյանին չենք անդրադարձել, բոլորի խոսքի համար բաց ենք եղել․ Արա Գոչունյանը՝ Պատրիարքարանից իրենց տրամադրված դրամական միջոցների մասին

Թուրքիայում հրապարակվող «Ժամանակ» թերթի խմբագիր Արա Գոչունյանի խոսքով՝ իրենց թերթի մասին դիտարկում անողները սեփական էթիկայի դիտանկյունից են խնդրին նայում:

Tert.am-ի հետ զրույցում նա անդրադարձավ իր ղեկավարած թերթի շուրջ եղած հրապարակմանն ու քննարկումներին, ըստ որոնց՝ թերթը պատրիարքարանի կողմից արված պաշտոնական հայտարարությունների ու գրությունների համար ամենից շատ գումարն է ստացել նախորդ տարի՝ 100 000 թուրքական լիրա, 30 000 լիրա էլ բաժին է հասել «Մարմարա» թերթին:

Նշենք, որ  «Ակօսում» հրապարակվածի համաձայն է, որ հայկական թերթերը նման գումար  են ստացել: Ուշադրություն է հրավիրվում այն փաստի վրա, որ  «հենց վերոնշյալ երկու պարբերականներն են հիմնականում աջակցում Աթեշյանին տարբեր իրավիճակներում ու հաճախ հրաժարվում լուսաբանել Աթեշյանի ընդդիմախոս անհատների կամ կազմակերպությունների միջոցառումները»:

«Պոլսո Հայոց պատրիարքարանում ավանդույթ կա, որ ամեն տարի Սուրբ Զատկի ընդունելության ժամանակ հրապարակվում է նաև պատրիարքարանի նախորդող տարվա բյուջեն: Այս տարի էլ նույնն է եղել, և այդ ամբողջի մեջ պատրիարքարանի հաշիվները շատ թափանցիկ ձևով ներկայացվել են մեր համայնքային կառավարիչներին և հանրությանը որպես սեփականություն»,- Tert.am-ին ներկայացրեց Արա Գոչունյանը:

Նա նշեց, որ «Ակօսը» դիմել է պատրիարքարանին նաև մամուլին տրամադրած ֆինանսների մասին տեղեկատվություն ստանալու համար, ինչը և տրամադրվել է լրատվամիջոցին: «Դրանից հետո, չգիտեմ ինչու, աղմուկ է բարձրացել: Պատրիարքարանը սկզբունքորեն հայատառ  լրատվամիջոցներին է հայտարարությունները տրամադրում և դրա համար վճարում: Հայատառ օրաթերթերի միջոցով են սովորաբար  պատրիարքարանի գովազդները տարածվում»,- ասաց նա:

Անդրադառնալով իրենց տրամադրված ֆինանսական աջակցության մասին քննարկումներին՝ Արա Գոչունյանը նշեց, որ ամեն ինչ պետք է համեմատության մեջ դիտարկել: «Ցանկացած գովազդ, ծանուցում ունի իր ծավալը լրատվամիջոցներում և ըստ այդմ է վճարվում»,- ասաց նա:

Նրա խոսքով՝ մինչ 2017 թվականը հայտարարություններն առավել քիչ էին լինում, իսկ անցած տարին քանի որ իրադարձաշատ էր, ավելի շատ հայտարարություններ, ազդագրեր հրապարակելու խնդիր ուներ պատրիարքարանը:

«Եղան շատ ցնցումներ, այդ ցնցումների մեջ պատրիարքարանը շատ ավելի կարիք ուներ լուսաբանումների, մեր ժողովրդին իր պատգամը փախանցելու անհրաժեշտություն է զգացել: Այդ իրավիճակում է, որ մամուլի համար վճարումներն այս տարի ավելացել են»,- ասաց նա:

Իրենց նպատակը, ըստ Արա Գոչունյանի,  հասարակությանը հավասարակշիռ տեղեկատվություն հաղորդելն է: «Մենք Պատրիարքարանի տրամադրած հայտարարությունները հրապարակում ենք, լինում էր՝ երկու լեզվով: Դրանով էլ է պայմանավորվել լրատվամիջոցում հրապարակվողի սակագինը: Մեզ մոտ նաև սակագինն է ավելի բարձր՝ համեմատած այլ լրատվամիջոցների: Դրա համար էլ մեզ տրամադրած գումարի տարբերությունը մնացածներից այդքան մեծ է»,- ասաց նա:

Անդրադառնալով այն քննադատություններին, ըստ որոնց՝ հիմնականում աջակցել են Արամ Աթեշյանին և չեն լուսաբանել նրա ընդդիմախոսներին, Արա Գոչունյանը, հակադարձեց՝ իրենք բացառապես Արամ Աթեշյանին չեն անդրադարձել, բոլորի խոսքի համար բաց են եղել:

«Մենք որևէ մեկի պաշտպանը չենք: Բոլորի հետ հավասար շփվող, բոլորին հավասարապես լուսաբանող լրատվամիջոց ենք»,- նշեց նա՝ հավելելով, որ իրենց մեղադրող լրատվամիջոցն է ոչ հավասար ձայնի իրավունք տալիս կողմերին:

Արա Գոչունյանը ներկայացրեց, որ «Ժամանակ» թերթը Պատրիարքարանի հայտարարությունների համար ֆինանսական միջոցներ է ստացել ոչ միայն Արամ Աթեշյանից, այլ նաև Գարեգին Բեքչյանից, որը մի քանի ամիս եղել է պատրիարքի տեղապահը:

«Գարեգին արքեպիսկոպոս Բեքչյանն էլ է իր ստորագրությամբ մամուլին գովազդ տվել: Մենք անձի գործունեությունը չենք լուսաբանում: Մենք Պոլսի պատրիարքական աթոռի գործունեությունն ենք լուսաբանում: Գումարը ստացել ենք Պատրիարքարանի լոգոյով, և ստորագրությամբ տեքստերն ենք հրապարակել: Եղել են շրջաններ, երբ պատրիարքարանի գործունեությունը լուսաբանելու ժամանակ ընդդիմադիր հայացքներ ենք ունեցել, բայց Պատրիարքարանի զեկույցները նորից հրապարակել ենք»,- նշեց նա:

http://www.tert.am/am/news/2018/04/09/Ara-gochunyan/2658587