Թուրքիայի իշխանությունները մեկնաբանել են Մալաթիայում ալևիների տների վրա տարբերակիչ նշանների հայտնվելը

Թուրքիայի կառավարությունում օրեր անց արձագանքել են Մալաթիա քաղաքում ազգայնական խմբավորումների կողմից տեղի ալևի բնակիչների տներին տարբերանշաններ դնելու հետ կապված միջադեպը:

Հիշեցնենք, որ օրեր առաջ Մալաթիա քաղաքի Ջեմալ Գյուրսել թաղամասում անհայտ անձինք ալևի բնակիչների տների դռներին տարբերակիչ նշաններ են արել, ինչն ահաբեկել էր բնակիչներին:

Ինչպես գրում է թուրքական Demokrathaber.org կայքը, Թուրքիայի փոխվարչապետներից Ռեջեփ Աքդաղը հանդես է եկել հատուկ հայտարարությամբ ու պնդել, որ իրենց երկրում թուրքերի և քրդերի միջև որևէ խնդիր չկա ու չի էլ եղել, իսկ միջադեպը կքննվի իրավապահների կողմից: Ըստ նրա՝ տեղի ունեցածը պարզապես սադրանք է:

«Այս հողերում թուրքն ու քուրդն իրար հետ խնդիր չունեն, սուննի մահմեդականն ու ալևին էլ խնդիր չունեն», – ասել է փոխվարչապետը:

Նա, սակայն, չի մեկնաբանել նույն քաղաքում նախօրեին հայկական միության շենքի վրա իրականացված հարձակումը:

http://www.tert.am/am/news/2017/11/27/malatia/2549700