Դիարբեքիրի Սուրբ Կիրակոս եկեղեցու ավերումից հետո առաջին անգամ այստեղ են ժամանել Պոլսո Հայոց պատրիարքարանից որոշ ներկայացուցիչներ ու տեղում ծանոթացել առկա իրավիճակին, այս մասին տեղեկանում ենք Ստամբուլի հայկական պարբերականներից «Ակօսի» միջոցով:
Ավերված եկեղեցու ներսում շրջելով՝ Արամ արքեպիսկոպոս Աթեշյանը լրագրողների հետ զրույցում հայտնել է, որ այսուհետ եկեղեցու պահպանման և վերակառուցման համար իրենք «գնդակը փոխանցել են պետությանը» և, մասնավորապես, մշակույթի նախարարությանը, որը պետք է զբաղվի հարցով:
«Ամեն կողմը քանդել են, սա անողը մարդ չէ, Աստծո ստեղծածը չէ», – ասել է Աթեշյանը, ով վորջին անգամ Սուրբ Կիրակոս էր այցելել երկու տարի առաջ՝ Դիարբեքիրի պատմական Սուր թաղամասում թուրք-քրդական բախումների վերսկսումից առաջ:
Աթեշյանը լրագրողների հետ զրույցում նշել է, որ այդ եկեղեցին ոչ միայն հայ համայնքի, այլև թուրքական պետության սեփականությունն է, և խնդրել իշխանություններին հետաքրքրվել հարցով:
«Հայկական Սուրբ Կիրակոս եկեղեցին, կողքին՝ ասորական եկեղեցին, 500 մետր այն կողմ՝ հայկական կաթոլիկ եկեղեցին, հայկական բողոքական եկեղեցին… Դրա շուրջն ապրող բնակիչների 97 տոկոսը հայեր էին, սա քրիստոնեական թաղամաս էր: Մեր գրողներից մեկն այստեղին «Գյավուրի թաղ» էր ասում: Այսօր թաղամսն էլ մի կողմ դրեք, Աստծո տունը հանդիսացող եկեղեցիներն ու մզկիթներն են ավերակ դարձել», – շարունակել է Աթեշյանը:
Հիշեցնենք, որ թուրք-քրդական բախումների կիզակետում գտնվող Սուր պատմական թաղամասի Սուրբ Կիրակոս եկեղեցին ավերածության էր ենթարկվել, այնուհետև պետականացվել: Թեև տեղի հայ համայնքի ջանքերով եկեղեցին հաջողվեց վերադարձնել հիմնադրամին և կանխել Սուրբ Կիրակոսի ամբողջական ավերումը, եկեղեցին վերաբացելն ու տարածք մտնելը երկար ժամանակ խոչընդոտվում էր:
2011թ.-ին վերակառուցված ու տեղի հայ համայնքի առաջ իր դռները բացած եկեղեցին ամբողջովին կողոպտված ու պղծված է, ինչպես նաև օգտագործվել է որպես պահեստ և ապաստարան զինված բախումների ժամանակ: Դեռևս անհայտ է մնում, թե ովքեր են եկեղեցին որպես պահեստ կամ կացարան օգտագործել՝ թուքական ԶՈւ-ի զինվորականները, թե քուրդ զինյալները
Նշենք, որ օգոստոսին՝ Սուրբ Աստվածածնի վերափոխման տոնին, Դիարբեքիրի հայ համայնքը չէր կարողացել մտնել եկեղեցի և նշել տոնը:
Leave a Reply