Հայերը վախի մեջ են ապրում. Գարո Փայլանը Թուրքիայում տապալված հեղաշրջումից հետո տիրող իրավիճակի մասին

Թուրքիայի Ժողովուրդների դեմոկրատական կուսակցության (HDP) հայազգի պատգամավոր Գարո Փայլանի հետ Tert.am-ը զրուցել է հուլիսի 15-ին Թուրքիայում հեղաշրջման փորձի տապալումից հետո տիրող իրավիճակի, դրան հաջորդող բազմաթիվ ձերբակալությունների հետևանքով առաջացած հասարակական տրամադրությունների և այլ հարցերի մասին:

Ըստ Գարո Փայլանի՝ հիմա Թուրքիայում ապրող ազգային փոքրամասնությունները, ընդդիմադիր համարվող մարդիկ վախի մեջ են ապրում, քանի որ հալածվում են թուրքական իշխանությունների կողմից: Նա հիշատակեց նաև Ստամբուլի քաղաքապետարանի արվեստի ու մասնագիտական կրթության կենտրոնում դասավանդող հայազգի Արի Հերգելին, որին աշխատանքից հեռացրել էին Էրդողանի «հակառակորդ» Ֆեթուլլահ Գյուլենի կառույցի հետ կապ ունենալու պատճառով:

«Այստեղի հայերն իհարկե վախի մեջ են ապրում»,-ասաց Գարո Փայլանը:

Հարցին, թե որպես ընդդիմադիր կուսակցության անդամ՝ ինչ մտավախություններ ունի, նրանց նկատմամբ հալածանքներ կլինե՞ն, Գարո Փայլանը պատասխանեց. «Մենք փորձել ենք մի քանի անգամ կապ հաստատել Էրդողանի և այլ կուսակցությունների հետ, բայց Էրդողանը հանդիպեց միայն երեք՝ Արդարություն և զարգացում, Ազգայնական շարժում և Հանրապետաժողովրդական կուսակցությունների հետ։ Ժողովուրդների դեմոկրատական կուսակցության հետ, որի անդամն եմ ես, չհանդիպեց: Սա նշանակում է, որ նրանք դասեր չեն քաղել այս հեղաշրջման փորձից»:

Ըստ նրա՝ հիմա Թուրքիայի նախագահն իր շուրջն է հավաքել ազգայնական կուսակցություններին, որոնք ոչ մի հարաբերություն չեն ցանկանում ունենալ իր անդամակցած Ժողովուրդների դեմոկրատական կուսակցության հետ:

«Դա ինձ հույս չի տալիս ապագայի համար, որովհետև թուրքերը լավ հարաբերությունների մեջ չեն հայերի, քրդերի և այլ ազգային փոքրամասնությունների հետ. սա նշանակում է, որ միշտ լինելու է թուրքական ազգայնական, Էրդողանի բռնատիրական պետականություն»,-ասաց Գարո Փայլանը:

Ստամբուլահայ պատգամավորից Tert.am-ը հետաքրքրվեց, թե ինչ փուլում է նրա՝ թուրք ազգայնականների դեմ հարուցած դատական գործը:

Հիշեցնենք, որ Թուրքիայի «Իդեալիստների օջախների» անդամները Բունդեսթագի կողմից Հայոց ցեղասպանությունը ճանաչող բանաձևի ընդունումից անմիջապես հետո նույն օրը ցույց էին կազմակերպել Ստամբուլում Գերմանիայի հյուպատոսարանի դիմաց: Ազգայնականները ձեռքում պահել էին Թուրքիայի և Ադրբեջանի դրոշները և բղավել. «Լավագույն հայը մեռած հայն է»:

«Ես դիմել եմ դատարան, բայց պատասխան չեմ ստացել։ Հեղաշրջման փորձի պատճառով հետաձգվել են դատի հետ կապված գործընթացները, բայց ես նորից հետևողական կլինեմ և այդ գործը ավարտին կհասցնեմ»,-ասաց Գարո Փայլանը:

Նշենք, որ վերը նշվածը պատգամավորի կողմից դատարան ներկայացրած միակ գործը չէ (Գարո Փայլանը հաղթել է «Գորշ գայլերի» Կարսի երիտթևի առաջնորդի դեմ դատը -Tert.am), որով ազգայնականները մեղադրվում են «ատելության խոսքի» տարածման մեջ:

«Իհարկե, սկզբից նրանք հակահայկական կոչեր, ցույցեր են անում։ Հետո երբ ես կամ ուրիշ մեկը դատ է բացում, ամաչում են և բառ չեն կարողանում ասել: Մենք էլ չենք կարող թույլ տալ, որ ատելության խոսքի հանցագործություններ լինեն»,-ասաց նա:

Tert.am-ը Գարո Փայլանի հետ խոսեց նաև զարգացող ռուս-թուրքական հարաբերությունների մասին՝ հետաքրքրվելով, թե ինչ ակնկալիքներ և սպասումներ կան այդ երկրների հարաբերություններից:

Ըստ Գարո Փայլանի՝ Թուրքիան Ռուսաստանի հետ իր հարաբերությունները բարելավվում է, որպեսզի Արևմուտքին և ԱՄՆ-ին ցույց տա, որ ինքն ունի այլընտրանքի հնարավորություն: «Էրդողանը դրա համար ունի իր պատճառները. հիմա նա Արևմուտքում համարվում է persona non-grata»,- ասաց նա:

Ըստ Գարո Փայլանի՝ չնայած Թուրքիան ամեն կերպ մեղադրում է Արևմուտքին, ԱՄՆ-ին, նաև՝ հեղաշրջման փորձի մեջ մեղավորությունն ունենալու մեջ, նրանք այնուամենայնիվ փորձում են դեռ բարեկամաբար վերաբերվել Թուրքիային. «Քանի որ նրանք ցանկանում են իրենց իշխանությունն ունենալ Թուրքիայում: Եթե այդպես չլինի, Թուրքիան ժողովրդավարական չի դառնա, զենքի ուժին կդիմի: Բայց դեռ Էրդողանի կողմից ազդանշան չկա: Նա ազգայնական, բռնատիրական քաղաքականություն է վարում և չի վստահում Արևմուտքին»:

Hayernaysor.am