Թուրքիոյ խորհրդարանին մէջ ներկայացուած կուսակցութիւնները ճշդած են խորհրդարանի նախագահի իրենց թեկնածուները

Թրքական «Ճումհուրիյէթ» օրաթերթը կը հաղորդէ, որ Թուրքիոյ իշխող Արդարութիւն եւ բարգաւաճում կուսակցութենէն բացի խորհրդարան մուտք գործած երեք ընդդիմադիր կուսակցութիւններն ալ ճշդած են խորհրդարանի նախագահի պաշտօնին իրենց թեկնածուներուն անունները:

Հանրապետական ժողովուրդի կուսակցութեան խորհրդարանի նախագահի պաշտօնի թեկնածուն է Տենիզ Պայքալ, քրտամէտ Ժողովուրդներու ժողովրդավարական կուսակցութեանը` Տենկիր Միր Մեհմեթ Ֆըրաթ, իսկ Ազգայնական շարժում կուսակցութեանը` Էքմելետտին Իհսանօղլու:

Թրքական լրատուամիջոցները նախապէս յայտնած էին, որ Արդարութիւն եւ բարգաւաճում կուսակցութիւնը համախոհական կառավարութիւն կազմելու համար համաձայնութիւն գոյացուցած է Ազգայնական շարժում կուսակցութեան հետ: Վերջինս ատոր դիմաց պահանջած է նախարարական 8 եւ երկու փոխվարչապետի պաշտօն, եւ նախնական համաձայնութիւն այն մասին, որ նորընտիր խորհրդարանի նախագահ պէտք է նշանակուի կուսակցութեան թեկնածուն` Էքմելետտին Իհսանօղլու:

HTTP://WWW.AZTAGDAILY.COM/ARCHIVES/246418