Թուրք փոխնահանգապետը խոստովանել է հայկական ժառանգության նկատմամբ իր թշնամանքը

Բիթլիսի (Բաղեշ-Ակունքի խմբ.) փոխնահանգապետ Սալիհ Ալթունը խոստովանել է, որ ինքը թշնամությամբ է լցված ներկայիս Թուրքիայի տարածքում հայկական ժառանգության նկատմամբ:
Ինչպես հաղորդում է «Արմենպրես»-ը` վկայակոչելով «Ակօս»-ը, այդ մասին Բիթլիսի փոխնահանգապետը հայտարարել է քաղաքում Սուրբ Ախպերիկ հայկական վանքը վերականգնվելու կապակցությամբ:
«Եթե չեմ սիրում մարդուն, նրա կառուցած շենքն էլ չեմ սիրում: Ինչո՞ւ պետք է այն պահպանեմ», -ասել է Ալթունը` նկատի ունենալով հայերին: Նա ասել է, որ չեն կարող մի կողմ թողնել «իրենց նախնիների` օսմանների և սելջուկների ժառանգությունը եւ պահպանել օտարներինը»:
Նշվում է, որ թուրք փոխնահանգապետն այդ մասին խոսել է անցյալ շաբաթ Շինարար ճարտարագետների տան և Բիթլիսի «Էրեն» համալսարանի կազմակերպած Պատմական հուշարձանների ամրացման և ապահով կերպով ապագային փոխանցելու աշխատանքների հանձնաժողովում ունեցած ելույթում:
Պետպաշտոնյայի նման պահվածքը խոսում է այն մասին, որ դրանով նա ներկայացրել է հայկական մշակութային ժառանգության նկատմամբ Թուրքիայի ղեկավարության շրջանակներում առկա տրամադրվածությունը:
Ավելի վաղ Բիթլիսի նահանգապետ Օրհան Օզթուրքը մերժել էր քաղաքի փողոցներից մեկն աշխարհահռչակ գրող Վիլյամ Սարոյանի անունով անվանակոչելու առաջարկը` հիմնավորելով դա այն բանով, որ իբր «Սարոյանը ոչ մի կապ չունի Բիթլիսի հետ»:
http://www.tert.am/am/news/2014/11/10/turq-haykakan/