ՀՑԹԻ-ում դանիացի գրող Ինգա Նալբանդյանին նվիրված միջոցառում է անցկացվել

Հայոց ցեղասպանության թանգարան–ինստիտուտի ժամանակավոր ցուցադրությունների սրահում տեղի ունեցավ դանիացի գրող, հայասեր Ինգա Նալբանդյանի ծննդյան 135 ամյակին նվիրված միջոցառում:
Միջոցառմանը ներկա էր նաև Ինգա Նալբանդյանի թոռը` Ֆրանս Նալբանդյանը:
Ողջույնի խոսքով հանդես եկավ ՀՑԹԻ տնօրեն Հայկ Դեմոյանը, ով հայ ժողովրդի անունից իր երախտագիտությունը հայտնեց մեծ հայասեր Ինգա Նալբանդյանին` նրա կատարած անգնահատելի աշխատանքի համար:
Ելույթ ունեցավ նաև Ինգա Նալբանդյանի թոռը` Ֆրանս Նալբանդյանը, ով մանրամասներ ներկայացրեց իր տատիկի կենսագրությունից:
Միջոցառմանը ներկայացվեց Ինգա Նալբանդյանի` դեռևս 1917 թվականին «Քո եղբոր արյունն է կանչում» եռապատումի հայերեն թարգմանությունը: Աշխատանքը բաղկացած է երեք գրքերից` «Մեծ ցավը», «Ճակատագրով պատժվածները», «Սպիտակ դաշտը»: Դանիերենից թարգմանություննը կատարել է Հասմիկ Կուրղինյանը:
Միջոցառմանը տեղի ունեցավ նաև Ինգա Նալբանդյանի 135-ամյակի առթիվ հրատարակված փոստային բացիկի մարման արարողություն:
Ինգա Նալբանդյանը, օրիորդական անունը` Հենրիետտե Լուսինդե Քոլին, ծնվել է 1879 թվականին դանիական Սոլերոդ քաղաքում` ազնվատոհմ Յոնաս Սիգիզմունդ Քոլինի ընտանիքում: Ծննդավայրում կրթությունը ստանալուց հետո, մեկնել է Շվեյցարիա` ֆրանսերենի դասեր առնելու: Այնտեղ էլ հանդիպել է ապագա ամուսնուն` Պաուլ Նալբանդյանին: 1904 թվականին նրանք ամուսնացել են: 1909 թվականին ամուսնու հետ ճամփորդել է Կոստանդնուպոլիս: Ամուսինը ստանձնել է հայկական գիմնազիայի տնօրինությունը, իսկ Ինգան աշխատանքի է անցել տեղի հայկական հիվանդանոցում:
Սկսվել է Առաջին համաշխարհային պատերազմը, և երիտթուրքերը սանձազերծել են հայերի կոտորածները:
Ինգայի ամուսինը ծանր հիվանդացել է և մահացել: Ինգա Նալբանդյանին ոչինչ չի մնացել անելու, քան փրկել երեխաներին: Նա վերադարձել է հայրենիք և հաստատվել Կոպենհագենում, որտեղ էլ 1929 թվականին հեռացել է կյանքից:
Ինգա Նալբանդյանն ունի հարուստ հրատարակչական կենսագրություն, բազմաթիվ ստեղծագործությունների հեղինակ է:
1916 թվականին մազապուրծ հասնելով Դանիա, նա ձեռնամուխ է եղել թղթին հանձնելու իր տեսածն ու լսածը: Երեք տարում գրել է պատմվածքների մի ամբողջ շարք և եռագրությունը, որը եվրոպական հասարակության համար հանդիսացավ Հայոց ցեղասպանության մասին գրելու առաջին փորձը:
Ինգայի գրքերը թարգմանվել են շվեդերեն, անգլերեն, ֆլամանդերեն և ֆրանսերեն: Ավելի ուշ Ինգան սկսել է համագործակցել Ազգերի Լիգայում Դանիայի պատվիրակ Հեննի Ֆորչհամերի հետ` ի պաշտպանություն Հայոց ցեղասպանությունից մազապուրծ եղած փախստականների իրավունքների:
AllTurkey.am