ԵՄ-Թուրքիա հանդիպումը հարաբերությունների լարվածության պատճառով հետաձգվել է

Եվրոպական Միության և Թուրքիայի բարձրաստիճան պաշտոնյաների միջև ծրագրված հանդիպումը կհետաձգվի եվրոպական կողմի նախաձեռնությամբ՝ այն մտավախությամբ, որ նման հանդիպումը կարող է ավելի սրել երկու կողմերի միջև հարաբերությունները վերջերս Թուրքիայում ավտորիտարիզմի խորացման հետևանքով Բրյուսելից Անկարայի հասցեին հնչող մեղադրանքների ֆոնին, գրել է Hurriyet Daily News-ը:

Ինչպես կայքի հետ զրույցում նշել է ԵՄ դիվանագետներից մեկը, Անկարայի և Բրյուսելի միջև հարաբերությունները գնալով վատթարանում են, սակայն դրանք կարող են է՛լ ավելի սրվել, եթե այդ հանդիպումը կայանար:

Թուրքիա-ԵՄ Ասոցացման խորհրդի հանդիպումն ի սկզբանե նախատեսված էր հաջորդ շաբաթ, ասել է դիվանագետը, որը ցանկացել է անանուն մնալ: Նրա խոսքով՝ նման մթնոլորտում, որն ավելի է թեժացել Թուրքիայում Twitter-ի և YouTube-ի փակման արդյունքում, նման հանդիպումն անցանկալի էր, և հավաքից հետո երկու կողմն էլ ավելի դժգոհ կմնային, քան նախկինում:

«Նրանք, ովքեր չեն ցանկացել անցկացնել հանդիպումը, բաժանված են երկու ճամբարի. ոմանք չեն ցանկացել, քանի որ դժգոհ են Թուրքիայից, մյուսներն էլ չեն ցանկացել, քանի որ բացի դժգոհ լինելուց, չեն ցանկացել շարունակել շփվել թուրքական կողմի հետ»,- ասել է ԵՄ-ի անանուն աղբյուրը:

Թուրքական աղբյուրներն էլ պարբերականին ասել են, որ Թուրքիան և ԵՄ-ն մոտ են Թուրքիա-ԵՄ Ասոցացման խորհրդի հանդիպումը հունիսին անցկացնելու շուրջ սկզբունքային համաձայնություն ձեռքբերմանը:

Անկախ հարաբերություններում առկա լարվածությունից՝ 2014թ. օգոստոսին Թուրքիայում կայանալու են նախագահական ընտրություններ, ինչը կարող է բարդացնել հանդիպման անցկացումը հունիսին քաղաքական հագեցած օրակարգի պատճառով: 

Միևնույն ժամանակ, Բրյուսելում ԵՄ դիվանագետները ձեռնպահ են մնացել մեկնաբանելուց Թուրքիայի արտգործնախարար Ահմեդ Դավութօղլուի հայտարարությունը, թե Եվրամիության ընդլայնման և հարևանության քաղաքականության հարցերով հանձնակատար Շտեֆան Ֆյուլեն պետք է հարցնի Թուրքիայի կարծիքը Թուրքիայում Twitter-ի և YouTube-ի փակման մասին մեկնաբանություններ անելուց առաջ:

«ԵՄ-ն ակնկալում է, որ թեկնածու յուրաքանչյուր երկիր գործի կոպենհագենյան չափանիշներին համապատասխան՝ ապահովելով, որ օրենսդրական նոր առաջարկները համապատասխանեն եվրոպական չափանիշներին»,- ասել է Շտեֆան Ֆյուլեի խոսնակ Պիտեր Ստանոն պարբերականի հարցմանն ի պատասխան:

«Ես խորհրդակցություններ կանցկացնեմ միայն իմ գործընկեր հանձնակատարների կամ Քեթրին Էշթոնի հետ»,-Daily News-ի հաղորդմամբ՝ ապրիլի 2-ին՝ Դավութօղլուի հայտարարությունից հետո, ասել է Ֆյուլեն ներքին շրջանակների հետ հանդիպման ժամանակ և հավելել, որ նույն բանն ասել է նաև Թուրքիայի ԱԳ նախարարին վերջինիս հետ հանդիպման ժամանակ:

 ԵՄ-Թուրքիա հարաբերությունների մասին ավելին՝ այստեղ: 

http://civilnet.am/eu-postpone-meeting-turkey-prevent-damage-ties/