Ռուսական «Ռուսպլաթ» կայքէջը կը հաղորդէ, որ Թուրքիոյ վարչապետ Ռեճեփ Թայիփ Էրտողան յայտարարած է, որ Պալքաններու մէկ մասը կը պատկանի իր երկրին, ինչ որ միջազգային գայթակղութիւն յառաջացուցած է:
Էրտողանը բացատրած է, թէ Պալքանեան թերակղզիին ո՛ր մասը կը պատկանի Թուրքիոյ: Ըստ անոր, Թուրքիոյ կը պատկանին Մակեդոնիոյ, Պուլկարիոյ եւ Պոսնիոյ մէկ մասը, ինչպէս նաեւ` Արեւմտեան Թրակիան:
Թուրքիոյ վարչապետի յայտարարութիւնը արդէն բացասական արձագանգ ստացած է Յունաստանի մէջ:
Էրտողանի խօսքերը սադրիչ կը նկատուին նաեւ այն պատճառով, որ Թուրքիա կը յաւակնի Եւրոպական Միութեան անդամակցութեան: Սակայն Միութեան միանալու համար Թուրքիոյ անհրաժեշտ է բոլոր անդամ պետութիւններուն, ներառեալ` Յունաստանի եւ Պուլկարիոյ աջակցութիւնը:-
Leave a Reply