Թուրքիայում «Մեծ մուրճ» հեղաշրջման գործով գեներալների ծանր պատժաչափերը հաստատվեցին Վճռաբեկի կողմից

Թուրքիայում մեծ աղմուկ հանած «Մեծ մուրճ» հեղաշրջման գործով` Վճռաբեկ դատարանը որոշում է կայացրել՝ 237 մեղադրյալի նկատմամբ հաստատելով դատարանի կայացրած վճիռը, 88 մեղադրյալի՝ ազատ արձակել, 36 մեղադրյալի՝ արդարացրել։

Թուրքական Milliyet-ի փոխանցմամբ՝ Թուրքիայի պատմության մեջ տեղի է ունեցել Վճռաբեկի ամենաերկար դատական լսումը, որն իր 17 նիստերով տեւել է մեկ ամիս։ Այս ընթացքում Վճռաբեկում լսել են 96 մեղադրյալի փաստաբանների պաշտպանական ճառերը։

Վճռաբեկ 9-րդ դատարանն ի վերջո հրապարակել է «Մեծ մուրճ» հեղաշրջման գործով վճիռը` անփոփոխ թողնելով 237 մեղադրյալի նկատմամբ դատարանի կայացրած վճիռը, հաստատելով 36 մեղադրայլի նկատմամբ դատարանի կայացրած արդարացման վճիռը եւ ազատ արձակման որոշում կայացրել 88 մեղադրյալի նկատմամբ, որոնց մեծի մասի համար նշվել է, թե հանցանքի վերաբերյալ չկան բավարար ապացույցներ։

«Մեծ մուրճ» հեղաշրջման գործով գլխավոր մեղադրյալների պատժաչափերը նույն են մնացել, ըստ որի, Մեծ մուրճ» հեղաշրջման փորձի գործով ամենածանր պատժաչափը՝ 20 տարի, ստացել են  գործով անցնող գլխավոր ամբաստանյալներ, Թուրքիայի ԶՈՒ 1-ին ցամաքային ուժերի նախկին հրամատար Չեթին Դողանը, օդուժերի նախկին հրամանատար Իբրահիմ Ֆըրթընան եւ ծովային ուժերի նախկին հրամանատար Օզդեն Օրնեքը:

Նշենք,  որ Թուրքական Taraf-ի կողմից հրապարակած փաստաթղթերի համաձայն՝ «Մեծ մուրճ» գործողությունների ծրագիրը իր մեջ ներառում էր  չորս ծրագրեր, որոնց արդյունքում պետք է ռազմական հեղաշրջում տեղի ունենար։

Նախատեսված է եղել ուրբաթօրյա աղոթքի ժամանակ պայթեցնել մզկիթներ, Էգեյան ծովի վրա գցել կործանիչներ, դրանցով ցույց տալ իշխող Արդարություն եւ զարգացում կուսակցության թուլությունը եւ իրականացնել հեղաշրջում։

Թուրք գեներալները արդարանում են՝ պնդելով, թե դրանք զուտ ուսումնական վարժանքների համար են նախատեսված եղել:

http://news.am/arm/news/175084.html