Թուրք ցուցարարները Գերմանիայում հանդես են եկել դասագրքերում Հայոց ցեղասպանության մասին պնդումների դեմ

Գերմանիայի Դյուսելդորֆ քաղաքում հավաքված թուրքերը պահանջել են երկրի մի շարք դպրոցներում պատմության դասագրքերից հանել «Թուրքերը 1915թ.-ի հայերի դեմ ցեղասպանություն են իրականացրել» ձևակերպումը։

Ինչպես տեղեկացնում է Time Turk-ը, իրականացված ստորագրահավաքի ընթացքում հավաքվել է 8.000 ստորագրություն։

Դյուսելդորֆում նրանք հանրահավաք են կազմակերպել և փորձել են ուշադրություն հրավիրել՝ միաժամանակ ներկայացնելով 8.000 ստորագրություններով փաստաթուղթը։

«Մեր նպատակն աղմուկ-աղաղակ բարձրացնելը չէ։ Մենք այստեղ ենք ուշադրություն գրավելու համար»,-հայտարարել է ակցիայի մասնակիցներից Ալի Սոյլենմեզօղլուն։

Նա նշել է, թե իրենք պահանջում են, որ մոտ ապագայում թեման ուսումնասիրվի երկու կողմերի մասնագետների կողմից, և իրենց պատասխան տրվի։ Հակառակ դեպքում սպառնում են շարունակել հանրահավաքները։

Գերմանացի ոստիկանները ցույցին չեն միջամտել։

http://www.tert.am/am/news/2013/06/24/germany-genocide/