Թուրքիայում բախումները շարունակվել են տարբեր քաղաքներում

Թուրքական տարբեր քաղաքներում ողջ գիշեր ցույցերը շարունակվել են։

Ինչպես տեղեկացնում է «Հյուրրիյեթը», Ստամբուլի Գեզի այգու ծառահատումների դեմ ցույցերին աջակցելու համար փողոց են դուրս եկել Ադանայի բնակիչները։

Չնայած ոստիկանության արգելքին՝ շուրջ 500 մարդ հավաքվել է իշխող Արդարություն և զարգացում կուսակցության գրասենյակի մոտ։

Ոստիկանությունը ցուցարարներին ցրել է ջրի շիթերի գործադրմամբ։ Ձերբակալվել է 25 մարդ։
Ակցիայի ընթացքում մի ոստիկան ընկել է 5 մետր բարձրությունից և ուղեղի ցնցում ստացել, նրա առողջական վիճակը ծանր է գնահատվում։

Ինչպես տեղեկացնում է «Ռադիկալը», բողոքի ակցիաներ են տեղի ունեցել նաև մայրաքաղաք Անկարայում։ Այստեղ ոստիկանությունը ցրել է հրապարակներում հավաքված ցուցարարներին, ապա հետապնդել նրանց փողոց առ փողոց։

Մայրաքաղաքում ևս կան ձերբակալվածներ, այդ թվում՝ երկու լրագրող։

Ուշագրավ միջադեպ է տեղի ունեցել Ռիզեում։ Այստեղ Թաքսիմ հրապարակի ցուցարարներին իրենց աջակցությունը հայտնելու համար հավաքվածների և ցույցերին դեմ արտահայտվող մի խմբի միջև բախում է տեղի ունեցել։

Ոստիկանությունը նրանց ցրելու համար դարձյալ արցունքաբեր գազ է կիրառել, ինչի հետևանքով կան տուժածներ։

Իսկ Ստամբուլում՝ Գեզի այգու մոտ, ցուցարարներն աղոթել են։
«Տեր Աստված… Արդեն 9 օր այս հրապարակում պայքարող մարդկանց ձայները լսի և նրանց ուժ տուր։ Լուսավորի՛ր պայքարի ընթացքում զոհվածների հոգիները։ Մեր հայրենիքում թող միշտ լինեն դաժան սուլթանի դեմ իրենց իրավունքների համար պայքարող երիտասարդներ»,-ասել են աղոթողները։

http://www.tert.am/am/news/2013/06/06/turkey-taksim/