Ֆրանսիայում Հայոց ցեղասպանության ժխտումը քրեականացնող նոր օրինագիծ ներկայացրած պատգամավոր Վալերի Բուայեն հայտարարել է, որ կյանքին սպառնացող վտանգի պատճառով այլևս երբեք չի այցելի Թուրքիա, տեղեկացնում է «Միլլիյեթ» պարբերականը։
Անցյալ տարի Ֆրանսիայի խորհրդարան օրինագիծ ներկայացրած պատգամավորն այս անգամ էլ երկու օրինագիծ է ներկայացրել։ Առաջինն առնչվում է Ցեղասպանության ժխտման քրեականացմանը, իսկ երկրորդով առաջարկվում է ստեղծել հանձնաժողով՝ 2012թ. ընդունված օրինագիծը Սահմանադրական խորհրդի կողմից հակասահմանադրական ճանաչելու որոշումը հետաքննելու համար։
Նա պնդել է, որ թուրքական կառավարության կողմից ինքն անարգվել է և սպառնալիքների ենթարկվել։
Բուայեն հայտարարել է, որ YouTube-ում իր հասցեին հայհոյանք և անարգանք պարունակող հարյուրավոր տեսանյութեր կան։
«Լավ է, որ թուրքերեն չեմ հասկանում։ Սակայն իմ և ընտանիքիս դեմ ֆրանսերենով էլ սպառնալիքներ եմ ստացել։ Ստիպված եղա մի շրջան ոստիկանների պաշտպանությամբ ապրել։ Ես Հայ-ֆրանսիական բարեկամության խմբի փոխնախագահն եմ։ Հայոց ցեղասպանության ժխտման պատժելիության համար պայքարս շարունակելու եմ»,-ասել է նա։
Պատգամավորը նշել է, որ սրանից առաջ այցելել է Թուրքիա, սակայն այժմ այցելել չի ցանկանում, քանի որ իր կյանքին այնտեղ վտանգ է սպառնում։
Բուայեն նշել է, որ անգամ եթե կառավարությունը խոստանա ապահովել իր անվտանգությունը, ինքը ռիսկի չի դիմի։
«Հրանտ Դինքին կառավարությունը չսպանեց, սակայն հայտնի չէ, թե ով սպանեց»,-ասել է նա՝ հավելելով նաև, որ ինքը Թուրքիայից, սպառնալիքներից բացի, նաև աջակցող հաղորդագրություններ է ստանում։
«Թուրքիայում դեռ մարդկանց իրավունքներին հավատացող մարդիկ կան»,-ասել է նա։
Leave a Reply