Human Rights Watch միջազգային իրավապաշտպան կազմակերպությունը հրապարակել է Մարդու իրավունքների մասին 2013-ի զեկույցը, որտեղ անդրադարձ է կատարվել 2012-ին Թուրքիայում մարդու իրավունքների ոլորտում իրականացված մոնիտորինգին: Այս մասին տեղեկանում ենք կազմակերպության պաշտոնական կայքից:
Զեկույցում նշվում է, որ Արդարություն և զարգացում կուսակցության առաջնորդ Ռեջեփ Թայիփ Էրդողանի կառավարությունը թեև կարողացել է 2012-ի տնտեսական աճ ապահովել, այնուհանդերձ, ձախողել է վճռական որոշումներ կայացնելում՝ ուղղված մարդու իրավունքների վատթարացող պատկերի փոփոխմանն ու ժողովրդավարության դեֆիցիտին:
Դատարանները շարունակում են ահաբեկչական օրենքներով դատապարտել քուրդ քաղաքական ակտիվիստներին, իրավապաշտպաններին, ուսանողներին, լրագրողներին: Համաձայն զեկույցի՝ Թուրքիայում ազատ խոսքն ու մեդիան շարունակում են մնալ սահմանափակ, բացի այդ, առկա են արդար դատաքննությունների լուրջ խախտումներ:
Զեկույցում քննադատվում են ազատ արտահայտվելու և հավաքների ազատությունը խոչընդոտելը, կանանց նկատմամբ բռնությունը, անվտանգության ուժերի կողմից խոշտանգումները, անմարդկային վեաբերմունքն ու մահացու ուժի կիրառումը։
Զեկույցում մեծ կարևորություն է տրվում անպատժելիության դեմ պայքարին: Մեծ խոչընդոտներ են առկա ոստիկանների, զինվորականների և պետական պաշտոնյաների կողմից չարաշահումների զոհերի համար արդարության ապահովման հարցում:
Կազմակերպությունը շեշտել է նաև 2007 թ. հունվարին լրագրող Հրանտ Դինքի սպանության ողջ գործի բացահայտման մեջ առաջընթացի բացակայությունը:
Leave a Reply