Անգլիական Guardian թերթի թղթակից Կոնստանս Լեչը հայտարարել է, որ Թուրքիայի վարչապետ Ռեջեփ Թայիփ Էրդողանի կողմից երկու տարի առաջ նախանշված քրդական խնդրի լուծմանն ուղղված նախաձեռնությունների ծրագիրը տապալվել է: Փոխարենը` թուրքական իշխանությունները ներկայում բանտ են նետում հազարավոր քուրդ լրագրողների, քաղաքական գործիչների եւ ակտիվիստների:
Ինչպես հաղորդում է «Արմենպրես»–ը, հոդվածագիրը նշում է, որ Թուրքիայի 44 քուրդ եւ թուրք լրագրողների դեմ սկսված դատավարությունը «մամուլը ճնշելու եւ քրդամետ ակտիվիստներին պատժելու ձեռնարկում է»: «Լրագրողներին 7-ից 22 տարվա ազատազրկում է սպասվում: Նրանք շինծու կերպով մեղադրվում են «Քուրդիստանի հանրությունների միության» (KCK) հետ համագործակցելու մեջ: Քրդերի դեմ բռնությունները Թուրքիայում սկսել են ավելի ակտիվանալ 2011-ի փետրվարից, ինչի պատճառով քուրդ ապստամբներն ավելի են թեժացրել թուրքական անվտանգության ուժերի դեմ բախումները»,-գրել է նա:
Լեչն ընդգծել է, որ Թուրքիայում 100-ից ավելի լրագրողներ ձերբակալված են, որը մեծ է Իրանում եւ Չինաստանում ձերբակալված լրագրողների թվից: Լրագրողը մեջբերել է նաեւ Amnesty International միջազգային իրավապաշտպան կազմակերպության հետազոտող Էնդրյու Գարդների հետեւյալ խոսքը. «Թուրքիայում լրագրողների նկատմամբ դատավարությունն ապացույցն է այն բանի, որ այդ երկրում քննդատական հոդվածը, քաղաքական մեկնաբանությունը եւ խաղաղ ցույցերը ներկայացվում են որպես ահաբեկչություն»:
Քրդական աղբյուրները հայտնում են, որ վերջին երկու տարիների ընթացքում Թուրքիայում ահաբեկչությանն աջակցելու շինծու մեղադրանքով 3500-ից ավելի քուրդ քաղաքական, հասարակական գործիչներ, լրագրողներ, քաղաքապետեր եւ պատգամավորներ են ձերբակալվել:
Leave a Reply