Սթամպուլի “Մարալ” երգի ու պարի խումբը Երեւանի մէջ

16 Օգոստոսին Երեւանի Ալ. Սպենդիարեանի անուան օփերայի ու պալէի պետական ակադեմիական թատրոնին մէջ համերգով հանդէս պիտի գայ Սթամպուլի Էսայեան Սաներու Միութեան “Մարալ” երգի ու պարի խումբը: Համերգի հովանաւորն է ՀՀ Սփիւռքի նախարարութիւնը:

Սթամպուլի “Մարալ” երգի ու պարի խումբը հիմնադրուած է 1980ին Բենոն Կուզաբաշի եւ ընկերներուն կողմէ: Խումբին գործունէութեան հիմնական նպատակն է հայկական մշակոյթը, պարերը, երգ-երաժշտութիւնը ներկայացնել հանրութեան: Մինչեւ 1986, երբ Բենոն Կուզուպաշ անժամանակ հեռացաւ կեանքէն, “Մարալ” խումբը բազմաթիւ համերգներ տուաւ ու շահեցաւ համայնքի սէրն ու գնահատանքը: Հիմնադրման 30ամեակին առիթով՝ մարալցիները երկու համերգով ներկայացան արուեստասէր հասարակութեան:

1992ին պարուսոյցի պաշտօնը ստանձնեցին 1980ականներու մարալցի պարողներ Կարպիս-Իրիս Չափքան ամուսինները. անոնք 19 տարի շարունակ՝ խումբը հասցուցին ներկայ հանգրուանին:

“Մարալ”ը այժմ բաղկացած է 6-14 տարեկան երեխաներէ կազմուած 90 անդամներով՝ մանկական խումբէն եւ 16-33 տարեկան 50 պարողներէ կազմուած խումբով։

2010ի ձեռնարկներու ծիրէն ներս՝ “Մարալ” պարախումբը Պատրիարքարանի հրաւէրով՝ ելոյթ ունեցաւ Վանի կեդրոնական մարզասրահին մէջ: Այս համերգը մեծ ընդունելութիւն գտաւ վանեցիներուն եւ աշխարհի տարբեր երկիրներէ ժամանած հայ ուխտաւորներուն կողմէ:

“Մարալ”ցիները կը մասնակցին նաեւ բարեսիրական համերգներու, եւ անցեալ տարի անոնք այդպիսի ծրագիրով մը օժանդակեցին ԶԻՊԵՉ հաշմանդամ մանուկներու կեդրոնին:

http://www.tert.am/hy/news/2011/07/29/maral/