Վերականգնվելու է պատմական եկեղեցի*

 Վերանորոգման աշխատանքներ սկսվեցին Էրզրումի Ուզունդերե գավառին ենթակա Չամլըյամաչ գյուղում գտնվող Օշվանք եկեղեցում: Հաղորդվեց, որ 60 հազար թուրքական լիրայի չափով գումարի հատկացումից բացի Մշակույթի և զբոսաշրջության նախարարությունից պահանջվել է 200 հազար թուրքական լիրա հավելավճար:

Լրավճարի պահանջ

Էրզրումի քարտեզագրության և հուշարձանների հարցերով տնօրեն Սուադ Բաքըրը պարզաբանեց, որ Ուզունդերե գավառում գտնվող պատմական Օշվանք եկեղեցու համար հանդես են եկել 200 հազար թուրքական լիրա հավելավճարի պահանջով: Բաքըրը հայտնելով, որ եկեղեցու խնամքի և վերանորոգման աշխատանքների համար անհրաժեշտ այս լրավճարն ստանալու նպատակով իրենք պաշտոնապես դիմել են Մշակույթի և զբոսաշրջության նախարարությանը, նշեց նաև, որ նախարարության պատասխանը կհստակեցվի առաջիկա ապրիլ ամսին: Սուադ Բաքըրը հայտնեեց, որ եկեղեցում վերականգնողական աշխատանքներ կատարելու նպատակով ներկայում հատկացվել է 60 հազար թուրքական լիրա, ընդգծեց, որ խնամքի և վերանորոգման աշխատանքներ սկսելու համար անհրաժեշտ է, որպեսզի ծրագրում ընդգրկվի հավելավճար: Սուադ Բաքըրը հետևյալն ասաց այդ կապակցությամբ. «Օշվանք եկեղեցու շուրջը կան մի շարք հուշարձաններ: Այս կառույցների մի մասը լուծարվել է գավառի ղեկավարության կողմից, սակայն Մշակույթի և զբոսաշրջության նախարարությունը մեր պահանջի հիման վրա կարող է պահանջել, որ այս բոլոր վայրերը պետականացվեն:  Այժմ չենք կարող ասել, թե այդ աշխատանքներն ինչ շրջանակ են ընդգրկելու: Նախարարությունը մեր պաշտոնական պահանջին իր տված պատասխանում կարող է կցել նաև տարբեր առաջարկներ ու հրահանգներ»:

Բացի այդ` Օշվանքի եկեղեցու խնամքի կարոտ վիճակը գրավել է նաև Էրզրումի նահանգապետ Սաբահադդին Օզթյուրքի ուշադրությունը: Վերջերս Ուզունդերե գավառում մի շարք հանդիպումներ ունեցած նահանգապետ Օզթյուրքն այցելել է նաև պատմական Օշվանք եկեղեցին և չի կարողացել իր զարմանքը թաքցնել եկեղեցու` ավերակ հիշեցնող տեսքի հանդեպ:

Վրացի զբոսաշրջիկների հետաքրքրությունը եկեղեցու հանդեպ

Իսկ Ուզունդերեի քաղաքապետ Հալիս Օզսոյը հայտնելով, որ ամեն տարի Օշվանք եկեղեցի է այցելում 2000-ից ավելի վրացի զբոսաշրջիկ, ասաց. «Այս եկեղեցին շատ կարևոր է վրացիների համար»:

Օզսոյը արձանագրելով, որ տվյալ շրջանի տեսարժան վայրերի մեջ Օշվանք եկեղեցին կենտրոնական տեղ է զբաղեցնում, հայտնեց նաև, որ եկեղեցու վերանորոգումից հետո այստեղ այցելող վրացի զբոսաշրջիկների թիվը կավելանա:

Օզսոյը հանդես եկավ տեղեկություններով

Քաղաքապետ Օզսոյը հետևյալ տեղեկությունները տվեց եկեղեցու մասին. «Օշվանք եկեղեցուց մեր օրերը հասած կառույցներն են եկեղեցին, երեք ժամատունը, հացատունը և գրապահոցը, որում պատճենվում և պահպանվում էին ձեռագիր մատյաններ: Պատմական աղբյուրներում նշվում է նաև, որ շրջանի եպիսկոպոսական կենտրոններից մեկը հանդիսացող այս եկեղեցին 11-րդ դարում եղել է նաև իր ձեռագիր մատյաններով հայտնի ու կարևոր մշակութային կենտրոն և իր այս նշանակությունը պահպանել է մինչև 15-րդ դար: Սույն եկեղեցին, որը 1985 թ. Մշակույթի նախարարության կողմից հաշվառվելով` ընդգրկվել է անշարժ մշակութային հարստությունների շարքը, որն անհրաժեշտ է պահպանել, հետագայում ավելացված արևմտյան հատվածից բացի` իր չափսերի շնորհիվ կրում է խաչաձև վրացական եկեղեցի լինելու հատկություն: Վանքի երեք ժամատներից միայն մեկն է հասել մեր օրերը, իսկ եկեղեցու սյուները, քարե ռելիեֆներն ու զարդաքանդակները, դժբախտաբար, վնասված են ապօրինի պեղումների և անտեղյակության պատճառով:

 http://www.erzurumgazetesi.com.tr/default.asp?page=haber&id=37270,  26.02.2010

*Ծանոթագրություն: Վրացական ներկայացվող հայկական այս եկեղեցու մասին կարող եք տեղեկություններ ստանալ մեր կայքէջի ՙՎանքեր, եկեղեցիներ՚ բաժնում` ՙՕշկվանք՚ վերնագրի տակ: