Թուրքիայի նախագահ Ռեջեփ Թայիփ Էրդողանի գլխավորությամբ տեղի է ունեցել Ազգային անվտանգության խորհրդի (MGK) նիստ, որից հետո հայտարարություն է հրապարակվել։
Թուրքիայի նախագահի աշխատակազմի հաղորդակցության վարչության տարածած հաղորդագրության համաձայն՝ նիստի ընթացքում խորհրդին տեղեկատվություն է տրամադրվել այդ երկրում ահաբեկչական ճանաչված «Քուրդիստանի բանվորական կուսակցության» (ՔԲԿ/PKK) «Ֆեթուլլահական կազմակերպության» (FETÖ) և «ԴԱԻՇ»-ի դեմ երկրի ներսում և արտերկրում իրականացվող գործողությունների վերաբերյալ։ Քննարկվել են նաև վերջին շրջանում տեղի ունեցած միջազգային զարգացումները։
Հաղորդագրության մեջ նշվում է, որ քննարկվել են «Առանց ահաբեկչության Թուրքիա» և «Առանց ահաբեկչության տարածաշրջան» նպատակների ուղղությամբ ձեռնարկված քայլերն ու արձանագրված առաջընթացը։
«Նշվել է, որ վճռականորեն շարունակվելու են երկրի և ժողովրդի, ինչպես նաև տարածաշրջանի անվտանգության, հարևան երկրների խաղաղության ու բարեկեցության ապահովման ուղղությամբ իրականացվող ջանքերը»,- ասվում է հայտարարության մեջ։
Նիստում քննարկվել են նաև Սիրիայի միասնության և տարածքային ամբողջականության ամրապնդման, պետական իշխանության՝ երկրի ողջ տարածքում տարածման և ինտեգրման գործընթացում արձանագրված դրական զարգացումները։
Հաղորդագրության համաձայն՝ Թուրքիան շարունակելու է աջակցել Սիրիայի ժողովրդին՝ երկիրը վերականգնելու և միջազգային հանրության հետ կապերն ամրապնդելու գործում։
Ընդգծվել է նաև, որ Իրաքի խաղաղությունն ու կայունությունը կարևոր նշանակություն ունեն ամբողջ տարածաշրջանի համար։
Նշվել է, որ Անկարան գոհունակությամբ է արձանագրում Իրաքի կառավարության՝ երկրի ողջ տարածքում պետական ինքնիշխանությունն ամրապնդելու ուղղությամբ իրականացվող ջանքերը։ Միաժամանակ վերահաստատվել է Իրաքի հետ ռազմավարական համագործակցությունն առաջ մղելու Թուրքիայի պատրաստակամությունը։
Հայտարարության մեջ անդրադարձ է կատարվել նաև ԱՄՆ-ի և Իսրայելի ու Իրանի միջև պատերազմին։
«Նշվել է, որ ԱՄՆ-ի և Իսրայելի ու Իրանի միջև պատերազմը շարունակվող հակամարտությունների պայմաններում վերածվում է արատավոր շրջանի՝ խորացնելով տարածաշրջանի խոցելիությունը»,- ասվում է հաղորդագրության մեջ։
Կողմերին կոչ է արվել վերադառնալ բանակցությունների սեղանի շուրջ և վերջ դնել հակամարտությանը, որի գլոբալ հետևանքները աստիճանաբար ավելի ծանր են դառնում։
Թուրքիայի ազգային անվտանգության խորհուրդը նաև նշել է, որ Իսրայելի իշխանությունները չեն կատարում Գազայում և Լիբանանում խաղաղության հաստատմանն ուղղված իրենց պարտավորությունները և շարունակում են հարձակումները։
Միջազգային հանրությանը կոչ է արվել կոնկրետ քայլեր ձեռնարկել Իսրայելի իշխանությունների դեմ, որոնք, ըստ հայտարարության, խախտելով նաև Սիրիայի տարածքային ամբողջականությունն ու ինքնիշխանությունը, խոչընդոտում են տարածաշրջանում կայունության հաստատմանը։
Նիստում քննարկվել է նաև ռուս-ուկրաինական պատերազմի ընթացիկ իրավիճակը և քաղաքացիական ենթակառուցվածքների ու նավագնացության երթուղիների վրա կենտրոնացած հարձակումների տարածաշրջանային և գլոբալ հետևանքները։
Հաղորդագրության համաձայն՝ վերահսկողությունից դուրս սրման և հակամարտության տարածման նշանների ֆոնին կողմերին կոչ է արվել ցուցաբերել զսպվածություն և հասնել հրադադարի։
Անդրադառնալով Եմենին՝ Թուրքիայի ազգային անվտանգության խորհուրդը նշել է, որ վերջին շրջանում լարվածության աճը մեծացնում է անվտանգության ռիսկերը տարածաշրջանում, հատկապես՝ հարևան երկրների համար։
Ընդգծվել է, որ անհրաժեշտ է հնարավորինս արագ ապահովել կայունություն և հանգստություն՝ հաշվի առնելով դրա կարևորությունը նաև գլոբալ կայունության տեսանկյունից։
Leave a Reply