Արևելագիտության ինստիտուտում տեղի ունեցավ սիրիահայ մտավորական և հասարակական գործիչ Աւօ (Ավետիս) Գաթրճեանի «Սուրիահայ պարբերական մամուլի մատենագիտութիւն (1912-2026թթ․)» գրքի շնորհանդեսը, որին մասնակցում էին դիվանագետներ, Հայաստանի գիտական, կրթական, մշակութային և գրադարանային ոլորտների, ինչպես նաև սփյուռքի ներկայացուցիչներ։
«Արմենպրես»-ի փոխանցմամբ՝ մենագրությունը գրված է արևմտահայերենով և հրատարակվել է Արևելագիտության ինստիտուտի գիտական խորհրդի որոշմամբ, «Հայագիտական ուսումնասիրությունները ֆինանսավորող համահայկական հիմնադրամի» աջակցությամբ։ Իր ելույթում Արևելագիտության ինստիտուտի տնօրեն, արևելագետ Գոհար Իսկանդարյանը նշեց, որ ինստիտուտն աջակցել է գրքի հրատարակությանը՝ կարևորելով դրա գիտական և քաղաքական նշանակությունը։ Այս տեսանկյունից, Արևելագիտության ինստիտուտը կամուրջ է ոչ միայն Հայաստանի և Մերձավոր Արևելքի երկրների, այլև, շատ դեպքերում, Հայաստան-սփյուռք գիտական հարաբերություններում։
Գրքի խմբագիր, հայ մամուլի պատմության մասնագետ Ալբերտ Խառատյանը և պատասխանատու խմբագիր, արաբագետ Արաքս Փաշայանն, անդրադարձան գրքի բովանդակային առանձնահատկություններին և մատենագիտական նշանակությանը, իսկ հեղինակը հանգամանորեն ներկայացրեց սիրիահայ մամուլի մեկդարյա պատմական ընթացքը՝ պատմական և աշխարհաքաղաքական փոխակերպումների համատեքստում։
Ելույթ ունեցողները նշեցին, որ աշխատանքը կարևոր ներդրում է ոչ միայն սիրիահայ, այլև ընդհանրապես հայ մամուլի և սիրիահայ համայնքի ուսումնասիրության տեսանկյունից և կարող է նպաստել այս ուղղությամբ հետագա հետազոտությունների ծավալմանը։ Գրքում ներառված են 228 թերթ և պարբերական, որոնցից 111-ը հայտնաբերվել, մոռացությունից փրկվել և առաջին անգամ գիտական շրջանառության մեջ են դրվել հեղինակի կողմից։
Միջոցառման ավարտին սիրիահայ հետազոտող Աւօ Գաթրճեանը Արևելագիտության ինստիտուտի տնօրենի կողմից ստացավ հատուկ շնորհակալագիր՝ արևելագիտության ոլորտում ունեցած ծանրակշիռ ներդրման համար։
Leave a Reply