Թուրքիայի ԱԳՆ-ն հանդես է եկել հայտարարությամբ՝ կապված Իսրայելի նախարարների կաբինետի կողմից Հայոց ցեղասպանությունը պաշտոնապես ճանաչելու առաջարկի միաձայն հաստատման հետ։
«Իսրայելի կառավարությունը, որը ողջ աշխարհի աչքի առաջ իրականացնում է պաղեստինցի ժողովրդի համակարգված ճնշումներ և գտնվում է ՄԱԿ-ի Արդարադատության միջազգային դատարանի դատավարության ներքո՝ Գազայի բնակիչների նկատմամբ ցեղասպանություն իրականացնելու մեղադրանքով, 1915 թվականի իրադարձությունների վերաբերյալ ընդունված քաղաքական բանաձևով ձգտում է կոծկել սեփական հանցագործությունները։
Այս չարամիտ նախաձեռնությունը, որն անտեսում է իրավական և պատմական փաստերը, ակնհայտորեն ցույց է տալիս այն իրավիճակը, որում հայտնվել են Նեթանյահուն և նրա հանցակիցները, որոնց նկատմամբ պաղեստինցիների դեմ կատարված հանցագործությունների վերաբերյալ Միջազգային քրեական դատարանի իրականացրած քննության շրջանակում տրվել են ձերբակալության օրդերներ։
Թուրքիան նաև հետագայում վճռականորեն կաշխատի տարածաշրջանում Իսրայելի էքսպանսիոնիստական և ապակայունացնող քաղաքականությանը վերջ դնելու, ինչպես նաև այն բանի համար, որպեսզի Նեթանյահուի կառավարությունը օրենքի առաջ պատասխան տա խաղաղ բնակչության, առաջին հերթին՝ պաղեստինցիների դեմ կատարված հանցագործությունների համար»,- ասվում է Թուրքիայի ԱԳՆ հայտարարության մեջ։
Հատկանշական է, որ հայտարարության մեջ չկա հայ ժողովրդի մասին ոչ մի հիշատակում՝ իր հայտարարության թեման ձևակերպելով որպես «1915 թվականի իրադարձություններ»։
Leave a Reply