Թուրքիան այս շաբաթ (06.04.26-10.04.26)

Միջազգային- Թուրքիայի արտգործնախարար․ «Աշխարհը պետք է պատրաստ լինի Իսրայելի նենգադուլ հարձակումներին»

Թուրքիայի արտաքին գործերի նախարար Հաքան Ֆիդանը հայտարարել է, որ իր երկիրը պատրաստ է ակտիվ դեր կատարել տարածաշրջանում։ Սիրիայի արտաքին գործերի նախարարի հետ հանդիպման ժամանակ Հաքան Ֆիդանը հանդես է եկել համատեղ մամլո ասուլիսով։ Ֆիդանը մասնավորապես նշել է, որ ներկայիս ճգնաժամերից պետք է դասեր քաղել ու շեշտել Իսրայելի «նենգադուլ նախաձեռնությունների դեմ զգոն լինելու անհրաժեշտության» մասին։ Թուրքիայի արտգործնախարարը նաև կարևորել է Իրանի և Ծոցի երկրների միջև հարաբերությունների բնականոնացումը և տարածաշրջանում նոր անվտանգության ու խաղաղության հաստատումը։ Նա հավելել է, որ Թուրքիան պատրաստ է ակտիվ դեր կատարել և իր նպաստն ունենալ այդ գործընթացում։ Ֆիդանը քննադատել է նաև Իսրայելի գործողությունները Լիբանանում՝ ընդգծելով, որ այդ հարձակումները հարյուրավոր մարդկանց կյանքն են արժենում։ Նա շեշտել է, որ պետք է վերջ դնել Լիբանանում Իսրայելի զավթողական նկրտումներին և պաշտպանել քաղաքացիական բնակչությանը։

Ընդդիմություն- Թուրքիայի ընդդիմադիրների օրակարգում լրացուցիչ խորհրդարանական ընտրություններն են

Թուրքիայի գլխավոր ընդդիմադիր կուսակցության՝ Ժողովրդահանրապետականի (Cumhuriyet Halk Partisi / CHP) առաջնորդ Օզգյուր Օզելն այցելել է Նոր բարօրություն կուսակցության (Yeniden Refah Partisi) առաջնորդ Ֆաթիհ Էրբաքանին։ 2 ընդդիմադիր կուսակցությունների առաջնորդները քննարկել են Թուրքիայի Ազգային մեծ ժողովում 8 պատգամավորների դատարկ աթոռները լրացնելու համար լրացուցիչ խորհրդարանային ընտրություններ պահանջելու հարցը։ Ժողովրդահանրապետական կուսակցության առաջնորդ Օզգյուր Օզելը նույն օրակարգով հանդիպել է նաև Թուրքիայի մյուս ընդդիմադիր ուժերի, մասնավորապես՝ Ժողովուրդների հավասարության և ժողովրդավարության (DEM Parti) կուսակցության, Թուրքիայի բանվորական կուսակցության (TİP), Աշխատավորական կուսակցության (EMEP), «Լավ» կուսակցության (İYİ Parti) և «Ապագա» կուսակցության (Gelecek Partisi) առաջնորդների հետ։

Տնտեսություն- Թուրքիայի Հանրապետության Կենտրոնական բանկը հրապարակել է մարտ ամսվա գների զարգացումների զեկույցը

Թուրքիայի Հանրապետության Կենտրոնական բանկը զեկույց է հրապարակել մարտ ամսին Թուրքիայի գների զարգացումների մասին։ Ըստ զեկույցի՝ սպառողական գները մարտին ավելացել են 1,94 տոկոսով, տարեկան գնաճը 0,66-ով նվազելով՝ արձանագրվել է 30,87 մակարդակով։ Մարտ ամսին սպառողական գնաճը գլխավորապես պայմանավորված է եղել աշխարհաքաղաքական զարգացումների հետ, որի հետևանքով էլ հատկապես թանկացել են էլեկտրաէներգիայի գները և վերջինիս միջոցով գոյացող որոշ ապրանքներ։ Քննարկվող ժամանակահատվածում էներգակիրների գներն աճել են 4,75%-ով՝ հիմնականում պայմանավորված հում նավթի համաշխարհային գների փոփոխություններով և վառելիքի գների աճով։ Միաժամանակ, ինդեքսացիայի մեխանիզմի կիրառումը զգալիորեն սահմանափակել է միջազգային էներգակիրների գների տատանումների փոխանցումը ներքին գնաճին։

Ռազմական- Թուրքիայի Հանրապետության փոխնախագահ Ջևդեթ Յըլմազ․ «Թուրքիայում հեղափոխություն է տեղի ունեցել ռազմական արդյունաբերության ոլորտում»

Թուրքիայի Հանրապետության փոխնախագահ Ջևդեթ Յըլմազը ելույթ է ունեցել Գյոլբաշըի «ASELSAN»-ի կամպուսում կազմակերպված «Համալսարան-ռազմական արդյունաբերություն ուժերի համախմբման» արարողության շրջանակներում։ Ջևդեթ Յըլմազն անդրադառնալով ԱՄՆ-ի և Իրանի միջև հրադադար հաստատելու հարցին մասնավորապես հայտարարել է․ «Մենք պատրաստ ենք մեր նպաստը բերել այդ գործընթացի հաջողության գործին։ Տա Աստված՝ մնայուն խաղաղություն կհաստատվի այս գործընթացի վերջում»։ Յըլմազն իր խոսքում անդրադարձել է նաև Թուրքիայի ռազմական արդյունաբերության ոլորտին և շեշտել․ «Ռազմական արդյունաբերության մեջ Թուրքիան վերջին 20 տարիներին այնպիսի փոփոխություններ է գրանցել, որոնք հեղափոխության արժեք ունեն»։  

Հասարակական- Անկարայում ուսանողները կոտրել են համալսարանի մարզադաշտի կողպեքը

Անկարայում գտնվող Մերձավոր Արևելքի տեխնիկական համալսարանի (Ortadoğu Teknik Üniversitesi) ռեկտորը փորձել է մարզադաշտում զանազան սահմանափակումներ մտցնել ուսանողների համար։ Վերջիններս, ի նշան բողոքի, հավաքվել են համալսարանի մարզադաշտում, մամլո հաղորդագրություն տարածել և կոտրել մարզադաշտի կողպեքը։ Ռեկտորը մասնավորապես արգելել է այնտեղ ուտել ու խմել։ Ուսանողներն իրենց վրդովմունքն արտահայտելու նպատակով երթ են կազմակերպել դեպի մարզադաշտ և հայտարարել, որ ամեն հինգշաբթի հավաքվելու են այնտեղ, մինչև որ այդ սահմանափակումները վերացվեն։

 Պատրաստեց Մելինե Անումյանը

www.akunq.net