Թուրքիայի ազգային պաշտպանության նախարարությունը հայտարարել է, թե «թույլ չի տա մոռացության մատնել հայերի կողմից ադրբեջանցիների նկատմամբ իրականացված ցեղասպանությունը»։
Ինչպես հաղորդում է APA-ն, Թուրքիայի ռազմական գերատեսչությունը հրապարակում է տեղադրել «մարտի 31-ին նշվող ադրբեջանցիների ցեղասպանության օրվա» կապակցությամբ։
«Պատմության մեջ որպես սև բիծ մնացած այդ ողբերգական օրերին հայկական զինված կազմավորումներն անգութ կերպով սպանել են հազարավոր անմեղ ադրբեջանցիների։ Մենք չենք մոռացել մեր եղբայրների դեմ իրագործված ցեղասպանությունը, չենք մոռանա և թույլ չենք տա մոռանալ։ Երախտագիտությամբ ու խոնարհումով հարգում ենք մեր նահատակների հիշատակը»,- ասված է հրապարակման մեջ։
Հիշեցնենք, որ խոսքը վերաբերում է անցյալ դարասկզբին իբր տեղի ունեցած ինչ-որ հնարովի «ցեղասպանության»։ Օրեր առաջ ՀՀ վարչապետ Փաշինյանը հայտարարել է պատմական անարդարության վերականգնումից հրաժարվելու մասին։ Իր որոշումը նա բացատրել է խաղաղությունն ամրապնդելու ձգտմամբ. «Ցեղասպանությունների մասին խոսույթով մենք ստանում ենք ցեղասպանությունների մասին խոսույթ, վերադարձի մասին խոսելով մենք ստանում ենք վերադարձի մասին խոսույթ և այդ ամեն ինչը մեկ բանի մասին է՝ Հայաստանի ժողովրդին, ներառյալ Ղարաբաղի ժողովրդին, թույլ չտալ, որ խաղաղվեն, նրանց պահել պանդուխտի և գաղթականի կարգավիճակով»։
Հերթական անգամ տեսնում ենք, որ Բաքվում չեն էլ մտածում պատերազմի և ցեղասպանության հռետորաբանությունից հրաժարվելու մասին։ Հայերի իրական Ցեղասպանությունից հրաժարցելուց զատ, նրանք առաջ են քաշում ադրբեջանցիների ինչ-որ հնարովի «ցեղասպանություն»։
Leave a Reply