Թուրքիան այս շաբաթ

Քաղաքականություն․ Դավութօղլուն Իրանի դեսպանին առաջարկել է քառակողմ գագաթնաժողով կազմակերպել

Թուրքիայի նախկին արտգործնախարար, «Ապագա» կուսակցության առաջնորդ Ահմեդ Դավութօղլուն և իր գլխավորած պատվիրակությունը փետրվարի 5-ին այցելել են Թուրքիայում Իրանի արտակարգ և լիազոր դեսպան Մոհամմադ Հասան Հաբիբուլլահ Զադեհին։ Թուրքական «ANKA» լրատվական գործակալության փոխանցմամբ՝ Դավութօղլուն տարածաշրջանային խնդիրները քննարկելու և լուծման ուղիներ որոնելու նպատակով Իրանի դեսպանին առաջարկել է կազմակերպել քառակողմ գագաթնաժողով, որին կմասնակցեն Թուրքիան, Եգիպտոսը, Սաուդյան Արաբիան և Իրանը։ Մոտ 2 ժամ տևած հանդիպումից հետո Դավութօղլուն թուրքական մամուլին մանրամասներ է հաղորդել հանդիպմանը քննարկված թեմաների մասին։ Ըստ Դավութօղլուի՝ աշխարհը ներկայում գտնվում է մեծ անորոշության մեջ, և ամեն պահի յուրաքանչյուր վայրում կարող է մի նոր ճգնաժամ ի հայտ գալ։ Թուրքիայի նախկին արտգործնախարարը նաև շեշտել է, որ իրենք դեմ են տարածաշրջանում ամեն տեսակի արտաքին միջամտության, և նման ճնշման դեպքում Թուրքիան պատրաստ է խորհրդակցություններ և քննարկումներ կատարել ինչպես Իրանի, այնպես էլ տարածաշրջանի այլ երկրների հետ։ Դավութօղլուն նաև ընդգծել է տարածաշրջանում կայունությունը վերականգնելու կարևորությունը։

Հետախուզություն․ Թուրքիայի Ազգային հետախուզության ծառայությունը «Մոսադ»-ի գործակալների է ձերբակալել

Թուրքիայի Ազգային հետախուզության ծառայությունը (Milli İstihbarat Teşkilatı / MİT) փետրվարի 6-ին 2 հոգու՝ Մեհմեդ Բուդաք Դերյային և Վեյսել Քերիմօղլուին է ձերբակալել Իսրայելի քաղաքական հետախուզությանը՝ «Մոսադ»-ին, տեղեկություններ տրամադրելու մեղադրանքով։ Թուրքական լրատվամիջոցները հայտնում են, որ կասկածյալներից մեկը՝ Մեհմեդ Բուդաք Դերյան, զբաղվում է մարմարի առևտրով։ Վերջինս իր հանցակցի հետ միասին տեղեկություններ է փոխանցել Թուրքիայում պաղեստինցի որոշ անձանց վերաբերյալ։ 

Տնտեսություն․ Թուրքիայում սպառողական գների ինդեքսը հունվար ամսին  աճել է 4,84, տոկոսով

Թուրքիայի Կենտրոնական բանկը հրապարակել է իր զեկույցը հունվար ամսվա գների վերաբերյալ։ Դրա համաձայն՝ սպառողական գների ինդեքսը Թուրքիայում 2026 թ․ հունվարին աճել է 4,84 տոկոսով։ Թուրքական «Անադոլու» պետական լրատվական գործակալության փոխանցմամբ՝ զեկույցում նշվում է, որ գների աճ է նկատվել հատկապես սննդի, էներգիայի և ոչ ալկոհոլային խմիչքների շրջանում։

Բանակ․ Գերմանիայում մեկնարկած ՆԱՏՕ-ի զորավարժություններին Թուրքիան մասնակցում է 2 հազար հոգանոց անձնակազմով

Փետրվարի 6-ին Գերմանիայում մեկնարկել է ՆԱՏՕ-ի՝ վերջին տարիների ամենամեծ զորավարժություններից մեկը՝ STEADFAST DART 2026-ը։ Թուրքիայի զինված ուժերը զորավարժություններին մասնակցում է 2 հազար հոգուց բաղկացած անձնակազմով։ Թուրքական «Հյուրիեթ» պարբերականը թեմային նվիրված հրապարակման մեջ շեշտում է, որ այդչափ մեծ թվով զորքերի մասնակցությունը վկայում է Թուրքիայի ՆԱՏՕ-ում ունեցած ազդեցիկ դիրքի և ռազմական մեծ հնարավորությունների մասին։ Հրապարակման մեջ նաև հիշեցվում է, որ Թուրքիան 2025 թ․ հուլիսի 1-ից մինչև 2026 թ․ հունիսի 30-ն առաջին անգամ ստանձնել  է ՆԱՏՕ-ում դեսանտային ուժերի հրամանատարությունը, և որ այս տարի կհյուրընկալի ՆԱՏՕ-ի գագաթնաժողովը։

Միջազգային․ Կանադայի վարչապետ՝ «Թուրքիան Կանադայի համար «կենսական դաշնակից է»»

Կանադայի վարչապետ Մարկ Քարնին Կանադայի Օնտարիո նահանգի Վոն քաղաքում փետրվարի 6-ին տեղի ունեցած մամլո ասուլիսի ժամանակ հայտարարել է, թե «Թուրքիան Կանադայի համար «կենսական դաշնակից» է ՆԱՏՕ-ի շրջանակներում։ Քարնին նաև խոսել է Թուրքիայի հետ առևտրի և արդյունաբերության ոլորտներում հարաբերությունները զարգացնելու հնարավորությունների մասին։ «Անադոլու» գործակալության համաձայն՝ Կանադայի վարչապետը շեշտել է նաև ռազմական և ատոմային էներգիայի ոլորտներում հարաբերությունների խորացման անհրաժեշտությունը։

Ընդդիմություն․ Ժողովրդահանրապետական կուսակցության առաջնորդն այցելել է 2023 թ․ երկրաշարժերից տուժած աղետի գոտիներ

Թուրքիայում ամենաազդեցիկ ընդդիմադիր կուսակցության՝ Ժողովրդահանրապետականի (Cumhuriyet Halk Partisi / CHP) առաջնորդ Օզգյուր Օզելը փետրվարի 3-ին այցելել է 2023 թ․ Թուրքիայում տեղի ունեցած ծանր երկրաշարժերից տուժած նահանգներ։ Օզգյուր Օզելը քննադատել է իշխող կուսակցությանը՝ ընդգծելով, որ երկրաշարժի հետևանքները վերացնելու համար մինչ օրս ծախսված 90 միլիարդ դոլարը չի ծառայել իր նպատակին։ «ANKA» լրատվական գործակալության հաղորդմամբ՝ ընդդիմադիր կուսակցության նախագահը մասնավորապես հայտարարել է․ «Եթե իշխող կուսակցությունն իր տված խոստումը պահեր և այդ գումարները ճիշտ օգտագործեր, այս տները վերակառուցված կլինեին»։

Հասարակություն․ Ստամբուլաբնակ թուրքերն ամենաշատը վախենում են երկրաշարժերից

Ստամբուլի պլանավորման գործակալության (İstanbul Planlama Ajansı / İPA) կատարած ուսումնասիրության համաձայն՝ ստամբուլաբնակ բնակչության ամենամեծ վախը կապված է երկրաշարժերի հետ։ Բնության այդ արհավիրքի նկատմամբ իր վախն արտահայտել է հարցմանը մասնակից մարդկանց 94․1 տոկոսը։ Ըստ Independent-ի թուրքական ծառայության հրապարակման՝ սոցիալական հարցման մասնակիցների 18 տոկոսը նաև մտավախություն է հայտնել, թե մեծ երկրաշարժի դեպքում իր ապրած շենքը կարող է փլվել, իսկ 14․3 տոկոսն էլ ենթադրում է, թե հնարավոր է, որ այն մեծ վնասներ կրի։ Հարցման մասնակիցների 85․7 տոկոսն էլ նշել է, որ ահ ունի, թե մոտ ապագայում Ստամբուլը կցնցվի մեծ երկրաշարժից։

Պատրաստեց Մելինե Անումյանը

www.akunq.net