Սոցհարցում Թուրքիայի քաղաքացիության մեջ քրդական ինքնության տարր մտցնելու առաջարկի մասին

Թուրքական «Metropoll Araştırma» հետազոտական ընկերության անցկացրած սոցհարցման համաձայն՝ Թուրքիայում հասարակության մեծ մասը չի աջակցում սահմանադրությունում քաղաքացիության սահմանման փոփոխության առաջարկին, ըստ որի, քաղաքացիության հասկացողությունն իր մեջ կարող է ներառել քրդական ինքնության տար:

Նախորդ տարվա՝ 2025-ի դեկտեմբերին, իրականացված «Թուրքիայի զարկերակը» ուսումնասիրության տվյալներով՝ ընտրողների շրջանում հարցվածների 60.7 տոկոսը հանդես է եկել փոփոխության դեմ, իսկ աջակցել՝ ընդամենը 34.5 տոկոսը։

Սոցհարցման արդյունքներով՝ իշխող Արդարություն և զարգացում կուսակցության (ԱԶԿ-AKP) ընտրողների դիրքորոշումը համեմատաբար մեղմ է եղել․ 40.1 տոկոսը կողմ, իսկ 56.4 տոկոսը դեմ է արտահայտվել գաղափարին։ Գլխավոր ընդդիմադիր ուժ համարվող Ժողովրդահանրապետական կուսակցության (ԺՀԿ-CHP) ընտրողների շրջանում էլ արձանագրվել է առավել կոշտ մոտեցում. հարցվածների 75 տոկոսն է դեմ արտահայտվել առաջարկին։

Ազգայնական կուսակցությունների՝ ԱԶԿ-ի հետ դաշինքի մեջ գտնվող Ազգայնական շարժում կուսակցության (ԱՇԿ-MHP) և Լավ կուսակցության (İYİ) ընտրողների շուրջ 82 տոկոսը ևս մերժել է փոփոխությունը, մինչդեռ ընդդիմադիր Ժողովուրդների հավասարություն և ժողովրդավարություն կուսակցության (DEM) գրեթե բոլոր ընտրողները՝ 95.6 տոկոսը, աջակցել է «նոր քաղաքացիության» գաղափարին։

Հիշեցնենք, որ Քուրդիստանի բանվորական կուսակցության (ՔԲԿ) հիմնադիր առաջնորդ Աբդուլլահ Օջալանի՝ զինյալներին զենքերը վայր դնելու և քրդական հարցի լուծման համար դիվանագիտական ճանապարհով շարժվելու կոչից հետո Թուրքիայում սկսվել է մի պորցես, որը հիմնականում կոչվում է «Լուծման գործընթաց»: Դրա շրջանակներում Թուրքիայի խորհրդարանում ստեղծվել է այդ հարցով զբաղվող «Համերաշխության, եղբայրության և ժողովրդավարության հանձնաժողով», որն էլ հիմնականում կոչվում է «Գործընթացի հանձնաժողով»:

https://ermenihaber.am/am/social/19879/