Դերսիմ (պաշտոնական անվանումը՝ Թունջելի) նահանգի Խոզաթ գավառի Գեչիմլի գյուղում գտնվող հայկական Էրգեն (Երկայն) եկեղեցին պարբերաբար ենթարկվում է գանձագողերի ավերումներին։ 1050 տարի առաջ կառուցված այս պատմական կոթողը պահպանելու կոչեր են հնչել տեղի բնակիչներից։ Այդ մասին, www.akunq.net –ի փոխանցմամբ, հաղորդում է թուրքական «Ջումհուրիյեթ» պարբերականը։
Աղբյուրի համաձայն՝ Էրզրումի (Կարին) մշակութային հարստությունների պահպանման խորհուրդը դեռևս 2012 թ․ դրական պատասխան էր տվել եկեղեցու վերականգման մասին դիմումին և պահպանման տակ վերցվել կառույցը։ Սակայն մինչ օրս թուրքական իշխանությունները որևէ քայլ չեն ձեռնարկել այն վերականգնելու ուղղությամբ։ Տեղի բնակիչներից Վեդաթ Ալդեմիրը թուրքական լրատվամիջոցի թղթակցի հետ զրույցում մասնավորապես նշել է․
«Եկեղեցին ներկայում հայտնվել է գանձագողերի թիրախում։ Ահա թե ինչու ժամ առաջ հարկ է լրջորեն պահպանման տակ վերցնել այն և, հնարավորության դեպքում, վերականգնողական աշխատանքներ իրականացնել։ Այս բնակավայրը ներկա պահին զբոսաշրջիկների ամենաշատ այցելած շրջաններից մեկն է։ Տեղի բնակիչներն էլ իրենց միջոցներով փորձում են պահպանել այն։ Այս պատմական կոթողին ամենամեծ վնասը հասցնում են գանձ որոնողներն ու պատմական հուշարձանների մաքսանենգները։ Կառույցի մի քանի հատվածներում փոսեր են փորված։ Այդ իսկ պատճառով այս վայրը պետք է շտապ պահպանման տակ առնվի, հարկ եղած դեպքում՝ պարանով սահմանազատվի և ապահով դառնա»։
Մեկ այլ համագյուղացի՝ Հայրի Յըլդըզը, հայտնել է, որ իրենք թուրքական իշխանություններից պահանջում են տեր կանգնել հուշարձանին, քանի որ այն պատմական եկեղեցի է և պահպանման կարիք ունի։ Տեղի բնակիչներից Մեհմեդ Օղուզն էլ հավելել է․ «Սա պատմական հավատքի վայր է։ Հարկ է պահպանել այն։ Այս եկեղեցին առնվազն մեկդարյա պատմություն ունի։ Ապագա չի ունենում այն հանրությունը, որը չի կարողանում պահպանել իր արժեքները։ Աշխարհի ոչ մի վայրում նման պատմության չես հանդիպի։ Եվ մենք գիտակցաբար ոչնչացնում ենք այն։ Մեր իսկ աչքի առաջ ավերվում է այս հուարձանը»։
Թարգմանեց Մելինե Անումյանը
Leave a Reply