Բացահայտվել է, որ Էրգենեքոնի անդամ լինելու մեղադրանքով ձերբակալված Նեդիմ Շեներին ու Ահմեդ Շըքին ուղարկված «Ակօս» շաբաթաթերթի համարները, մեկ ամիս է, ինչ չեն հասել նրանց` «վտանգավոր» լինելու փաստարկով:

Սպանված լրագրող Հրանտ Դինքի հիմնած «Ակօս» շաբաթաթերթի համարները մարտի 11-ից սկսած պաքրբերաբար ուղարկվել են Էրգենեքոնի գործի հետաքննության շրջանակներում ձերբակալված և Սիլիվրիի կալանատանն արգելափակված լրագրողներ Նեդիմ Շեներին և Ահմեդ Շըքին, սակայն այդ համարներից և ոչ մեկը երեկվա դրությամբ չեն հասել Շեներին ու Շըքին, իսկ երբ վերջիններս հարցրել են դրա պատճառը, ստացել են հետևյալ պատասխանը. «Արդարադատության նախարարությունը թույլ չի տալիս»:

Նեդիմ Շեները երեկ ժամը 12:30-ին հանդիպել է լրագրող Մուրադ Սաբունջուին և նրան հայտնել, որ «Ակօս» շաբաթաթերթն իրենց չի հանձնվել: Սաբունջուն նաև հաղորդել է, որ Շեներին ասվել է, թե «Ակօս»-ը տեղ չի գտել հիշյալ նախարարության կողմից թույլատրվող պարբերականների ցանկում:

Երբ մենք դիմեցինք Արդարադատության նախարարությանը, որպեսզի տեղեկանանք, թե ինչու «Ակօս»-ը չի տրվում Շեներին ու Շըքին, նախարարության իրավասուները պատասխանեցին, թե «Ակօս շաբաթաթերթն առաջին անգամ միայն երեկ (այսինքն` նախորդ օրը) է ստացվել, բանտ բերվող բոլոր պարբերականները կալանավորներին և դստապարտյալներին հանձնվում են մանրակրկիտ ուսումնասիրության ենթարկվելուց հետո միայն, ուսումնասիրություն, որի ժամանակ ստուգվում է, թե տվյալ թերթերի մեջ որևէ բան դրված կամ գրված է, թե ոչ: Այսինքն` այդ թերթերը ստուգվում են` բանտ տարվող բոլոր իրերի նման: «Ակօս» շաբաթաթերթն էլ այդ ստուգումներից հետո այսօր (երեկ) նրանց է հանձնվել»:  

«Ակօս» շաբաթաթերթի գլխավոր խմբագիր Ռոբեր Քոփթաշը հետևյալն ասաց «Վաթան» օրաթերթին տված հարցազրույցում. «Բոլոր հիմնավորումներից անկախ` մենք դատապարտում ենք այդ գործողությունը, իսկ կառավարությանը` կոչ անում վերացնել այդ ցուցակում տեղ գտած բոլոր թերթերի վրա դրված արգելքը, եթե նման ցանկ գոյություն ունի»:

Հակասություն օրենսդրության մեջ

Ըստ օրենքի` դատապարտյալներն իրավունք ունեն վճարելով գնել և օգտվել պարբերական մամուլից` «պայմանով, որ դա արգելված չլինի դատարանների կողմից»: Սակայն բանտի ղերակավարներից կազմվող Դաստիարակիչ խորհուրդը կարողանում է արգելել` որոշ պարբերականներ տալ կալանավորներին ու դատապարտյալներին, եթե անգամ տվյալ թերթերն արգելված չլինեն էլ դատարանների կողմից: Կալանատներում «Ակօս»-ի վերաբերյալ առաջին արգելքի մասին լուրն ստացվել էր սրանից 3 տարի առաջ, երբ Թեքիրդաղի F տիպի բանտում Դաստիարակիչ խորհրդի որոշմամբ բանտի ղեկավարները պատռել էին «Ակօս»-ի հայերեն էջերը:

«Վաթան» օրաթերթ

14.04.2011