Թուրքիան երբեք չի ապավինել ԵՄ-ի օգնությանը և չի տեսնում դրա անհրաժեշտությունը։ Այս մասին երկուշաբթի օրը PBS հեռուստաալիքին տված հարցազրույցում ասել է Թուրքիայի նախագահ Ռեջեփ Թայիփ Էրդողանը։
Մեկնաբանելով Եվրամիությանն անդամակցելուց հրաժարվելու հավանականությունը՝ նա ասել է. «Վերջին հինգ տասնամյակների ընթացքում Թուրքիան եղել է Եվրամիության դռների մոտ, և մենք միշտ ինքնաբավ ենք եղել»: «Մենք երբեք հույս չենք դրել ԵՄ-ի միջոցների կամ աջակցության վրա, ուստի դա մեզ անհրաժեշտ չէ»,- հավելել է Էրդողանը։
Նա նաև ընդգծել է, որ ԵՄ-ին Թուրքիայի անդամակցության և ՆԱՏՕ-ին Շվեդիայի անդամակցության հարցերը կապված չեն։ «Մենք բազմիցս հայտարարել ենք, որ պատրաստ ենք աջակցել ՆԱՏՕ-ին անդամակցելու Շվեդիայի հայտին, սակայն Շվեդիան պետք է նախաձեռնություն ցուցաբերի և կատարի իր խոստումները, քանի որ ահաբեկիչները դեռ ազատորեն շրջում են Ստոկհոլմի փողոցներում», – ասել է նախագահը։
Նրա խոսքով՝ Թուրքիայի խորհրդարանը քննարկում է Շվեդիայի դիմումը։ «Այդտեղ է, ի վերջո, այն կվավերացվի»,- ասաց նա: «Որպեսզի դա տեղի ունենա, իհարկե, Շվեդիան պետք է կատարի իր խոստումները։ Ահաբեկչական կազմակերպությունները պետք է անհապաղ դադարեցնեն իրենց ցույցերը Ստոկհոլմի փողոցներում, նրանք պետք է դադարեցնեն իրենց գործունեությունը, քանի որ թուրք ժողովրդի համար շատ կարևոր կլինի տեսնել, որ դա իրականում տեղի է ունենում»,- պարզաբանել է նախագահը։
Նա նաև ընդգծել է, որ ԱՄՆ-ից 40 F-16 Block 70 կործանիչներ գնելու Թուրքիայի խնդրանքը կապված չէ դաշինքին Շվեդիայի անդամակցության հետ։
