Ռուսերենով առաջին անգամ լույս է տեսել Թուրքիայի ներկայիս նախագահ Ռեջեփ Թայիփ Էրդողանի «Ավելի արդար աշխարհը հնարավոր է» գիրքը, հայտնում է «Ինտերֆաքս»-ը։

Ռուսական «Պրոսպեկտ» հրատարակչության կողմից թողարկված գրքում ներկայացված են ժամանակակից աշխարհակարգի վերաբերյալ հարցերի լայն շրջանակ՝ համաշխարհային անարդարություն, փախստականների խնդիրներ, միջազգային ահաբեկչություն եւ իսլամաֆոբիա գլոբալ քաղաքականությունում։ Առանձին ուշադրություն է դրձվում ՄԱԿ-ի օրինականության, ֆունկցիոնալության, արդյունավետության, ներառականության թեմային։

Գիրքը, որը լույս է տեսել Թուրքիայում 2021 թվականի սեպտեմբերին, հիմնված է «Աշխարհը հինգից ավելի է» հայեցակարգի վրա, որը Էրդողանը ներկայացրել է 2013-2014 թվականներին, երբ նա դեռ վարչապետ էր։ «Հինգ» ասելով թուրք առաջնորդը նկատի ունի ՄԱԿ-ի Անվտանգության խորհրդի մշտական ​​անդամներին։

Թուրքիայի նախագահը ուշադրություն է հրավիրում ՄԱԿ-ի Անվտանգության խորհրդի համապարփակ բարեփոխման անհրաժեշտության վրա, որը, նրա կարծիքով, «ծառայում է միայն վետոյի իրավունք ունեցող հինգ երկրների շահերին»։

Հեղինակը համոզված է՝ ավելի արդար աշխարհ հնարավոր է միայն այն դեպքում, եթե ՄԱԿ-ի բարեփոխմանն ուղղված հիմնարար, համապարփակ միջոցներ ձեռնարկվեն, որոնց դեպքում կապահովվի արդար ներկայացուցչություն եւ կվերացվի վետոյի «արտոնությունը»։

News.am