Թուրքիայում ալևիացված հայերի մասին նոր գիրք է հրատարակվել

Թուրքիայում «Այրընթը» հրատարակչությունը լույս է ընծայել Քազըմ Գյունդողանի «Ալևիաց(վ)ած հայերը․ մենք ենթակա ենք Քրիստոսին, պարտական՝ Ալիին» վերնագրով գիրքը։ Այդ մասին հայտնում է www.akunq.net/am-ը՝ հիմնվելով «Այրընթը» հրատարակչատան Մամուլի և հասարակայնության հետ կապերի բաժնի տարածած հաղորդագրության վրա։

Աղբյուրի համաձայն՝ 528 էջից բաղկացած սույն աշխատությունը կազմված է 3 հիմնական բաժիններից։

Առաջին բաժնում հեղինակը ներկայացնում է այն հարցազրույցները, որ ինքն իրականացրել է 72 ալևիացված հայի հետ։

Երկրորդ բաժնում Քազըմ Գյունդողանը խնդրին անդրադառնում է ի սկզբանե ալևի եղած մարդկանց դիտանկյունից՝ հիմնվելով նման 12 հոգու հետ իրականացված հանդիպումների արդյունքների վրա։

Երրորդ և վերջին բաժնում հեղինակը մանրամասն վեր է հանում 1915 թ․ Հայոց ցեղասպանությունից առաջ Դերսիմի շրջանում հայության բնակավայրերի և թվաքանակի հետ առնչվող հիմնահարցերը։

Հիշեցնենք, որ սույն գրքի հեղինակ Քազըմ Գյունդողանը հայտնի նաև «Քահանայի թոռները» գրքով, որը ևս հրատարակվել էր «Այրընթը» հրատարակչատան կողմից։

Մելինե Անումյան

Akunq.net/am

Leave a Reply

Your email address will not be published. Required fields are marked *