Թուրքական «Թարաֆ» թերթը, հղում կատարելով «Վիքիլիքսում» հրապարակված փաստաթղթին, նշում է, որ ամերիկացիները նախօրոք զգուշացրել էին Անկարային «Ակօսի» խմբագրապետ Հրանտ Դինքի, կաթոլիկ հոգևորական հայր Սանտորոյի սպանությունների և «Զիրվե» քրիստոնեական հրատարակչատան վրա հարձակման մասին:
2005 թվականի մարտի 11-ին Թուրքիայի կրոնի հարցերով նախարարությունը մի հայտարարություն էր տարածել, որում տեղ էր գտել «գողանում են մեր երեխաների հավատքը» արտահայտությունը, ինչը քրիստոնյա հոգևորականներին թիրախ էր դարձնում Թուրքիայում: Այս առթիվ ամերիկյան կողմը Կրոնի հարցերով նախարարությանն ու Թուրքիայի կառավարությանը կոչ էր արել հայտարարության մեջ փոփոխություններ մտցնել»:
«Հյուրրիյեթի» փոխանցմամբ` Մալաթիայի քրիստոնեական համայնքը մշտապես գտնվում էր ԱՄՆ–ի ուշադրության կենտրոնում: Ամերիկացիները դեռ 1 և կես տարի առաջ հանդիպել էին «Զիրվե» հրատարակչատան կոտորածը կազմակերպելու մեջ կասկածվող Հուսեին Եքլիի հետ:
Նշենք, որ հայր Սանտորոն սպանվել էր 2006 թվականին Տրապիզոնում, մոլեռանդ մուսուլման թուրքի կողմից, ով հանցագործության պահին անչափահաս էր:
2007 թվականի ապրիլի 18-ին Մալաթիայի «Զիրվե» հրատարակչատուն ներխուժեցին 5 իսլամիստ մոլագարներ և սպանեցին Աստվածաշունչ տպագրող 3 քրիստոնյաների, որոնցից երկուսն ազգությամբ թուրք էին, մեկը` գերմանացի:
Պոլսում հրատարակվող երկլեզու «Ակօս» շաբաթաթերթի խմբագրապետ Հրանտ Դինքը սպանվել է Շիշլի թաղամասում գտնվող խմբագրատան առջև, 2007 թ. հունվարի 19-ին: Չնայած խոսուն ապացույցներին՝ Դինքի մարդասպանը՝ Օգյուն Սամասթը և նրա հանցակիցներ Յասին Հայալն ու Էրհան Թունջելը, դեռ չեն ստացել իրենց արժանի պատիժը: Թուրքական դատարանը դանդաղկոտություն և անվճռականություն է ցուցաբերում, ինչի համար քննադատության է արժանացել ոչ միայն միջազգային հանրության, այլ նաև՝ Մարդու իրավունքների եվրոպական դատարանի կողմից:
Նշենք նաև, որ 55-ամյա հայ լրագրողի սպանությունից առաջ թուրքական իշխանությունները հասցրել էին նրան մեղավոր ճանաչել Թուրքիայի Քրեական օրենսգրքի տխրահռչակ 301-րդ հոդվածով:
01.04.2011
HayNews.am
