Թուրքիայում 1955 թ․ սեպտեմբերի 6-7-ի բռնարարքների ժամանակ փորձել են պայթեցնել նաև Իսկենդերունի ուղղափառ եկեղեցին

Թուրքիայի Հանրապետության պատմությունը լի է քրիստոնյա և այլադավան փոքրամասնությունների դեմ իրականացված բռնարարքներով։ 1955 թ․ սեպտեմբերի 6-ին և 7-ին հատկապես Կ․Պոլսում և Զմյուռնիայում հույների, հայերի ու հրեաների դեմ կատարված պոգրոմները արդեն հանրահայտ փաստ են։ Նաև հայտնի է, որ դրանք իրականում կազմակերպված են եղել Թուրքիա պետության կողմից։

Այս ցավալի դեպքերի տարելիցներին նորանոր փաստեր են ի հայտ գալիս։ Այսպես, պարզվում է, որ այդ օրերին հարձակում է կազմակերպվել նաև Իսկենդերունի (պատմ․ Ալեքսանդրետի շրջանը) եկեղեցու դեմ։ Այդ մասին, Akunq.net-ի փոխանցմամբ, Nehna.org կայքէջում գրում է պատմաբան Էմրե Ջան Դաղլըօղլուն։

Ըստ պատմաբանի՝ դեպքը գրանցվել է 1955 թ․ սեպտեմբերի 8-ի, լույս 9-ի գիշերը։ Հարձակումն իրականացնող անձինք մտել են տեղի Սուրբ Նիկոլայ եկեղեցի և դինամիտներ տեղադրել այնտեղ։ Մինչև իսկ դրանցից մեկը հասցրել է պայթել։ Բարեբախտաբար, մարդկային կորուստներ չեն գրանցվել, սակայն եկեղեցու պատերը լրջորեն տուժել են։

«Իսքենդերուն» պարբերականի համաձայն ՝ ոստիկանությունն անմիջապես հետաքննություն է սկսել դեպքի կապակցությամբ։ Թեև նույն լրատվամիջոցը ենթադրում էր, թե մեղավորները վաղ թե ուշ կհայտնաբերվեն ու կպատժվեն, սակայն այդպես էլ ոչ մեկը չի ձերբակալվել, առավել ևս՝ պատժվել։ Էմրե Ջան Դաղլըօղլուն վերջում հիշեցնում է, որ Ստամբուլում և Իզմիրում կատարված բռնարարքների հեղինակները ևս չեն գտնվել ու մինչ այժմ չեն դատապարտվել։

Թարգմանեց Մելինե Անումյանը

Akunq.net  

Leave a Reply

Your email address will not be published. Required fields are marked *