Պատրիարք Հայրը այցելեց Վանի կուսակալը

Ն.Ա.Տ. Սահակ Բ. Պատրիարք Հայրը, 4 Սեպտեմբեր 2022, Կիրակի, յաւարտ Աղթամարի մէջ մատուցուած Ս. Պատարագի, ընկերակցութեամբ՝ Պատրիարքական Փոխանորդ Արժ. Տ. Գրիգոր Աւ. Քհնյ. Տամատեանի եւ Վանի Մշակոյթի եւ Զբոսաշրջութեան Տնօրէն՝ Էրօլ Ուսլուի, յատուկ փոխադրամիջոցաւ մը Աղթամարի Կղզիէն ուղղուեցաւ դէպի Վանի Կուսակալութիւն։ Մեր Հոգեւոր Պետը ժամը 15.00-ին պաշտօնարանին մէջ քաղաքավարական այցելութիւն մը տուաւ Վանի Կուսակալ՝ Օզան Պալճըին։

Մեծայարգ Կուսակալը, Կուսակալութեան մուտքին դիմաւորեց Նորին Ամենապատուութիւնը եւ ապա, պաշտօնական հանդիպում տեղի ունեցաւ։ Այս առթիւ, բարի գալուստ մաղթեց Մեր Հոգեւոր Պետին եւ ուրախութիւն յայտնեց, որ համավարակէ յետոյ բազմաթիւ ուխտաւորներու եւս մասնակցութեամբ իրականացած էր Աղթամարի Ս. Խաչ Եկեղեցւոյ աւանդական կրօնական արարաղութիւնները։ 

Նորին Ամենապատուութիւնը, որ նախապէս շնորհաւորած եւ յաջողութիւն մաղթած էր մեծայարգ կուսակալին իր պաշտօնի ձեռնարկման առիթով, կրկին անգամ իր բարեմաղթութիւնները ներկայացուց։ Այս առթիւ, անդրադառնալով Աղթամարի արարողութեան, յայտնեց, թէ՝ Ստանպուլէն եւ արտասահմանէն պատկառելի թիւով ուխտաւորներով, ինչպէս նաեւ հոգեւորականներով փութացած էին Վան քաղաքը։ 

Պատրիարք Հայրը շնորհակալութիւն յայտնեց թէ ընծայուած ընդունելութեան, եւ թէ արարողութեան կատարման կապակցութեամբ ընձեռուած դիւրութեանց համար։ Իբր յիշատակ այս այցելութեան, Կուսակալին նուիրեց Հայ Եկեղեցւոյ արծաթեայ գոյքերուն հետ առընչուած գիրք մը։ Իսկ Վանի Կուսակալը նուիրեց գորգ մը։

Աւելի քան կէս ժամուայ տեսակցութեան աւարտին, Մեր Հոգեւոր Պետը ուրախ տրամադրութեամբ բաժնուեցաւ Վանի Կուսակալութենէ։

https://www.facebook.com/TRHayBad

Leave a Reply

Your email address will not be published. Required fields are marked *