Վերականգնվում են թուրք-իսրայելական դիվանագիտական հարաբերությունները

Թուրքիան որոշել է դեսպան նշանակել Իսրայելում եւ վերականգնել դիվանագիտական ​​հարաբերությունները, հայտարարել է արտգործնախարար Մեւլութ Չավուշօղլուն։

«Իսրայելում դեսպան նշանակելու որոշում է կայացվել, իսրայելական կողմից եւս դրական պատասխան է ստացվել այդ կապակցությամբ։ Շուտով մեր թեկնածությունը կներկայացվի պարոն նախագահին»,- ասել է նա մամուլի ասուլիսին։

Նա նաեւ հույս է հայտնել, որ այդ գործընթացը հաջող կլինի երկու կողմերի համար։

Ընդ որում, օգոստոսի սկզբին Անկարան դատապարտել էր Իսրայելի պաշտպանության բանակի օդային հարվածները Գազայի հատվածի ուղղությամբ՝ «Իսլամական ջիհադ» խմբավորման դեմ «Արշալույս» օպերացիայի շրջանակներում:

Թուրքիայի հետ լիարժեք դիվանագիտական ​​հարաբերությունների վերականգնումը կօգնի ամրապնդել տնտեսական հարաբերությունները եւ բարեկամությունն իսրայելցի եւ թուրք ժողովուրդների միջեւ, հայտարարել է Իսրայելի նախագահ Յիցհակ Հերցոգը։

«Ես ողջունում եմ Թուրքիայի հետ լիարժեք դիվանագիտական ​​հարաբերությունների վերականգնումը, որը կարեւոր իրադարձություն է եւ կամրապնդի տնտեսական հարաբերությունները, փոխադարձ զբոսաշրջությունը եւ բարեկամությունն իսրայելցի եւ թուրք ժողովուրդների միջեւ։ Բարիդրացիական հարաբերությունները եւ մերձարեւելյան գործընկերության ոգին կարեւոր են բոլորիս համար»,- ասված է նախագահի հայտարարության մեջ:

Իր հերթին, վարչապետ Յաիր Լապիդն ասել է, որ Թուրքիայի հետ հարաբերությունների վերականգնումը կարեւոր է տարածաշրջանային կայունության համար եւ «կարեւոր տնտեսական նորություն է Իսրայելի քաղաքացիների համար»։

Իսրայելի եւ Թուրքիայի հարաբերությունները կտրուկ վատթարացան 2010 թ. Թուրքիայից Գազայի հատված մեկնած Mavi Marmara նավի իսրայելական հատուկ ջոկատայինների գրավման հետ կապված միջադեպից հետո։ 2018 թ. մայիսին Անկարան առաջարկել էր Թուրքիայում Իսրայելի դեսպանին լքել երկիրը Գազայի հատվածում Իսրայելի հիմնադրման 70-ամյակի եւ ԱՄՆ դեսպանատունը Թել Ավիվից Երուսաղեմ տեղափոխելու կապակցությամբ բողոքի ցույցերից հետո։ Այդ ժամանակ բախումների հետեւանքով 59 պաղեստինցի զոհվեց, ավելի քան 2.7 հազար մարդ վնասվածքներ ստացավ։

https://news.am/arm/news/716411.html

https://news.am/arm/news/716423.html

Leave a Reply

Your email address will not be published. Required fields are marked *