Հայոց ցեղասպանագիտության ռահվիրա Վահագն Դադրյանի շիրիմն անտեր է…

Օրերս նշվեց Հայոց Ցեղասպանության ականավոր հետազոտող, պատմաբան Վահագն Դադրյանի մահվան տարելիցը: Սրան զուգահեռ Դադրյանը իր հայրենիքում ոչ գերեզմանաքար ունի, ոչ էլ գերեզմանի տեղն հուշող որևէ նշանակ:

Այս մասին տեղեկանում ենք ազգությամբ թուրք հայտնի ցեղասպանագետ Թաներ Աքչամի կողմից իր ֆեյսբուքյան օգտահաշվում կատարված հետևյալ գրառումից.
«Խորապես ցնցված եմ և տխուր։ Ձեզ հետ կիսվում եմ Հայոց ցեղասպանության ուսումնասիրության հիմնադիր պրոֆեսոր Վահագն Դադրյանի գերեզմանի լուսանկարներով։ Դադրյանի մարմինը Հայաստան է տարվել և հողին հանձնվել 2019 թվին: Լոս Անջելեսի Արարատ Էսքիջյան թանգարանի տնօրեն Մեգգի Գոշչինի համառ որոնումներից հետո հայտնաբերվեց թաղման վայրը։ Այն էլ միայն գերեզմանատան ղեկավարության հետ համառ բանակցություններից հետո… Դադրյանին թաղել են առանց որևէ նշանի, էլ չենք խոսում տապանաքարի մասին, և նրա գերեզմանը ծածկված էր մոլախոտով։ Երեւանում ցեղասպանության հուշահամալիր տանող ճանապարհին փոքրիկ հուշատախտակներ, արձաններ ու ծառեր են տնկված՝ ի հիշատակ ցեղասպանության ժամանակ հայերին օգնած օտարերկրացիների։ Նրանց հիշում եք ամեն քայլափոխի: Եվ այնուամենայնիվ ցեղասպանագիտության հիմնադիրը անտերի պես շպրտվել է գերեզմանոց… Գերեզմանը մոլախոտերով է ծածկված, և ոչ մի գերեզման հիշեցնող բան չկա էլ։ Սա բոլոր հայերի ու նրանց բարեկամների՝ բոլորիս համար մեծ խայտառակության աղբյուր է։ Իր կյանքը Հայոց ցեղասպանության ուսումնասիրությանը նուիրած եւ մեզ վեր բարձրանալու հարթակ տված Դադրյանը արժանի չէր սրան։ Անշուշտ նրա տեսակետները կքննարկենք, սակայն սա այն չէր, ինչ պետք էր անել այն մարդու հետ, ով իր կյանքը նվիրել է այս ճանապարհին։ Թե ովքեր են պատասխանատու Հայաստանում Դադրյանի գերեզամանի կառուցման համար՝ չգիտեմ։ Այստեղ ոչ մեկին էլ մեղադրելու կողմնակից չեմ։ Մեծ բացթողում կա, որը պետք է շտկվի. Այստեղ ցանկանում եմ առաջարկել բոլորիս զգայուն լինել այս հարցի շուրջ և կատարել մեր բաժին անելիքը։ Ուզում եմ հայտնել, որ կանեմ առավելագույնը իմ և իմ կազմակերպության անունից»։

Ցեղասպանագիտության, մասնավորապես Հայոց Ցեղասպանության ուսումնասիրության մեջ անգնահատելի ներդրում ունեցող պատմանաբանի գերեզմանի վիճակը ազգությամբ թուրք ցեղասպանագետին ավելի է հուզում, քան Դադրյանի հայրենակիցներին:

Այստեղ ամփոփված է Վահագն Դադրյանը…

Leave a Reply

Your email address will not be published. Required fields are marked *