Երեկ թուրքական զանգվածային լրատվամիջոցները հաղորդեցին, որ սեպտեմբերին կկայանա հայ-թուրքական բանակցությունների հատուկ ներկայացուցիչներ Ռուբեն Ռուբինյանի և Սերդար Քըլըչի հերթական հանդիպումը։ Մինչև իսկ որոշ թուրքական աղբյուրներ մանրամասներ հայտնեցին հանդիպման կոնկրետ վայրի (Կարս) վերաբերյալ։ Թեև ՀՀ Արտգործնախարարության պաշտոնական ներկայացուցիչը շտապեց հերքել այդ լուրերը, այնուամենայնիվ թուրքական պարբերականները շարունակում են ուշագրավ դետալների հրապարակումը։

Այսպես, օրինակ, երեկ թուրքական «Հյուրիեթ» հեղինակավոր օրաթերթը, կրկնելով արդեն իսկ հրապարակված տեղեկությունները, նաև ընդգծել է, որ հայ-թուրքական բանակցություններում Հայաստանի ներկայացուցիչ Ռուբեն Ռուբինյանի և Թուրքիայի ներկայացուցիչ Սերդար Քըլըչի միջև մինչ օրս 500-ից ավել հեռախոսազրույց է կայացել։

Ուշագրավ է, որ «Հյուրիեթ»-ում երեկ հրապարակված լուրում նաև նշվել էր, թե Հայաստանի ներկայացուցիչ Ռուբեն Ռուբինյանի և Թուրքիայի ներկայացուցիչ Սերդար Քըլըչի «քիմիան բռնել է», և որ Ռուբինյանը Քըլըչին զանգահարելիս միշտ սկզբում թուրքերեն է խոսել և ասել․ «Ağabey nasılsın?” («Աղաբե՛յ, ինչպե՞ս ես») (տես՝ https://hyetert.org/2022/08/11/turkiye-ermenistan-normallesme-surecinin-perde-arkasi-kilic-ve-rubinyan-500den-fazla-telefonla-gorustu-2/) : Սակայն այսօր տվյալ հրապարակման մեջ որոշ վերախմբագրումներ են կատարվել, և Հայաստանի ներկայացուցչի մեծ համակրանքի հատվածները ջնջվել են (տես՝ https://www.hurriyet.com.tr/gundem/ermenistan-turkiye-normallesme-surecinin-perde-arkasi-kilic-ve-rubinyan-500den-fazla-telefonla-gorustu-42116711):

Թարգմանեց Մելինե Անումյանը

Akunq.net