Օգոստոսի 15-ին հունական Սյումելա վանքում պատարագ կմատուցվի

Ներկայիս Թուրքիայի Հանրապետության տարածքում գտնվող Տրապիզոնի Սյումելա հունական վանքում այս տարվա պատարագը կմատուցվի օգոստոսի 15-ին։ Այդ մասին, ըստ Akunq.net-ի, հաղորդում է «Իհլաս» լրատվական գործակալությունը։

Աղբյուրի համաձայն՝ 4-րդ դարում կառուցված Սյումելա վանքում վերաբացումից հետո արդեն 9-րդ անգամ նախատեսվող պատարագը նվիրված կլինի Սուրբ Մարիամ Աստվածածնի համբարձման տոնին։ Պատարագը կմատուցվի Հունաց Տիեզերական պատրիարք Բարդուղիմեոսի ձեռամբ։

Աղբյուրը հիշեցնում է, որ Սյումելայում վերաբացումից հետո առաջին պատարագն անցկացվել է 2010 թ․ օգոստոսին, ապա 2015 թ․ սկսած՝ 4 տարի դադար է տրվել, քանի որ վանքում վերանորոգման աշխատանքներ էին ընթանում։

Ակնկալվում է, որ պատարագին կմասնակցեն նաև Ռուսաստանից, Հունաստանից և Վրաստանից ժամանած հոգևորականներ և մեծաթիվ հավատացյալներ։

Հիշեցնենք, որ այս տարվա փետրվարին թուրքերը պղծել էին Սյումելա վանքը։ Այսպես, DJ Ահմեդ Շենթերզին իր երաժշտական խմբի հետ մեկտեղ այնտեղ տեսահոլովակ էր նկարահանել՝ հատուկ թույլտվություն ստանալով տեղի նահանգապետարանից։ Տեսահոլովակի նկարահանման ժամանակ վանքում էլեկտրոնային երաժշտություն էր հնչել, և նկարահանումն ուղեկցվել էր պարերի կատարմամբ։

Այս տեսարանը սոցիալական մեդիայում վրդովմունքի տեղիք էր տվել։ Դեպքի առթիվ իր վրդովմունքն էր հայտնել նաև Հելլենական ուղղափառ եկեղեցու մշտական սինոդը՝ դա անվանելով սրբավարի պղծում։

https://www.iha.com.tr/trabzon-haberleri/sumela-manastirinda-15-agustosta-9-kez-ayin-yapilacak-3846471/

Թարգմանեց Մելինե Անումյանը

Akunq.net

Leave a Reply

Your email address will not be published.