«Արմենիա Սակրա»․ ֆրանսահայ բեմադրիչը կ՝ուզէ աշխարհին պատմել Հայաստանի եւ Արցախի մասին

Շուտով Փարիզի եւ եւրոպական շարք մը քաղաքներու մէջ պիտի ցուցադրուի ֆրանսահայ բեմադրիչ Նարեկ Ոսկանեանի «Արմենիա Սակրա» ֆիլմը։ Ասիկա 65 վայրկեան տեւողութեամբ փաստավաւերագրական ֆիլմ է, որուն նկարահանումները կատարուած են Հայաստանի եւ Արցախի մէջ, Ն.Ս.Օ.Տ.Տ. Գարեգին Բ կաթողիկոսի օրհնութեամբ։

Ֆիլմի գլխաւոր նիւթը միջնադարեան հայկական ճարտարապետութիւնն է՝ եկեղեցիները, վանքերը, բերդերը եւ անոնց պատմութիւնը, կը ներկայացուի նաեւ Հայաստանի բնութեան բացառիկ գեղեցկութիւնը։

Sputnik Արմենիայի հետ զրոյցի ընթացքին՝ ֆիլմը արտադրող Նարէ Թադէոսեան նշած է, որ Արցախի նկարահանուած եկեղեցիներէն, վանքերէն, ամրոցներէն շատերը այժմ կը գտնուին Ազրպէյճանի կողմէ գրաւուած տարածքներուն մէջ։

Նկարահանումները կատարուած են պատերազմէն առաջ՝ 2019 թուականին, փաստօրէն, նաեւ այս առումով պատկերները բացառիկ են, հաւանաբար նաեւ վերջին վաւերացումներն են։

«Մենք նկարահանումներ ըրած ենք Ծիծեռնավանքի, Դադիվանքի, Տիգրանակերտի, Տող գիւղի մէջ, նկարահանած ենք Հադրութի շրջանի քանի մը բերդեր, Քարվաճառը։ Այժմ, փաստօրէն, մեր այս տարածքները գրաւուած են Ազրպէյճանի կողմէ։ Ես ի սկզբանէ ֆիլմի սենարը գրելու ժամանակ յատուկ շեշտադրած եմ, որ անոնք մաքուր հայկական տարածքներ եւ կոթողներ են, պատերազմէն ետք սենարական եւ մոնթաժային ոչ մէկ փոփոխութիւն չեմ ըրած։ Այս ֆիլմը դիտելէ ետք օտարերկրացին վստահաբար դահլիճէն կը հեռանայ՝ իր յիշողութեան մէջ պահելով, որ այդ բոլոր եկեղեցիները եւ քաղաքները հայերունն են եւ պարզապէս Ազրպէյճանի յարձակողական քաղաքականութեան պատճառով գրաւուած են»,- Sputnik Արմենիայի հետ զրոյցի ընթացքին նշած է բեմադրիչ Նարեկ Ոսկանեան։

Ֆիլմին նպատակն է համայն աշխարհի հայութեան, նաեւ օտար հանդիսատեսին ներկայացնել Հայաստանը, հայկական մշակոյթը, պատմութիւնը, ցոյց տալ Հայաստանի գրաւչութիւնը՝ անով նաեւ նպաստել զբօսաշրջային հոսքերու աճին։

Ֆիլմի յետկադրային նիւթը կը կարդայ ֆրանսացի յայտնի օփերայի երգիչ Մարիօ Հաքքարդը։ Բացառիկ հարցազրոյցով հանդէս կու գայ աշխարհահռչակ հայագէտ Ժան Փիեռ Մահէն: Արտադրողի խօսքով՝ այսօր, երբ Ազրպէյճանը զբաղած է հայկական յուշարձաններու, մշակոյթի իւրացումով, եւրոպացի հեղինակաւոր մասնագէտին խօսքը առաւել ծանրակշիռ ու կարեւոր վկայութիւն կը դառնայ այդ յուշարձաններու հայկականութեան մասին։

«Աշխարհին յայտնի է մեր հայկական վանքերուն, եկեղեցիներու կառուցման ինքնատիպ ըլլալը, սակայն ատոր հետ մէկտեղ շատ գաղտնիքներ եւ խորհուրդներ կան, որոնց մասին մենք ալ տեղեակ չենք։ Ֆիլմը այս առումով ալ բացառիկ բացայայտումներ կ՝ընէ, քանի որ կ՝անդրադառնայ հայկական եկեղեցիներու կառուցման գաղտնիքներուն՝ իւրաքանչիւր սիւնի, եկեղեցւոյ կառուցման դիրքին, անգամ լոյսի թափանցման ուղղութիւնը դէպի եկեղեցի մեր մօտ խորհրդանշական կերպով նշուած է։ Այդ մասին կը խօսի նաեւ աշխարհահռչակ հայագէտ Ժան Փիեռ Մահէն»,- ըսած է Նարեկ Ոսկանեան։

Ան ընդգծած է՝ թէեւ ֆիլմը փաստավաւերագրական է, բայց ռեժիսորը առանձնայատուկ կարեւորութիւն տուած է նաեւ պատկերի գեղագիտութեան։

«Ըլլալով մասնագիտութեամբ նաեւ լուսանկարիչ եւ նկարիչ՝ Նարեկը պատկերի, լոյսի եւ ստուէրի իւրայատուկ լուծումներու միջոցով ֆիլմին իսկապէս մոգականութիւն հաղորդած է»,- նշած է Նարէ Թադէոսեան։

Ֆիլմը դեռ ֆրանսերէնով է, յառաջիկային կը թարգմանուի նաեւ հայերէնի։ Նշենք, որ ասիկա ռեժիսորի երկրորդ երկարատեւ փաստավաւերագրական աշխատանքն է։ Առաջին ֆիլմը՝ «Հայաստանի գանձերը», ցուցադրուած է Եւրոպայի տարբեր քաղաքներու մէջ՝ պատկերասրահներու, հայկական ընկերակցութիւններու, ինչպէս նաեւ Գանատայի մէջ։ Հեղինակները յոյս ունին, որ «Արմենիա Սակրա» ֆիլմը կը գերազանցէ առաջինի յաջողութիւնը։

Ֆիլմին հեղինակները լիայոյս են, որ սփիւռքահայ համայնքները, դեսպանութիւնները աշխուժութիւն կը ցուցաբերեն ֆիլմի ցուցադրութիւնը նաեւ իրենց երկիրներուն մէջ կազմակերպելու համար, չէ՞ որ անիկա հայուն եւ օտարին կը պատմէ Հայաստանի եւ Արցախի մասին։

Նշենք, որ բեմադրիչ Նարեկ Ոսկանեանը արտերկրի մէջ կ՝ապրի 11 տարեկանէն։ Միջնակարգ կրթութիւնը ստացած է Վարշաւայի մէջ, այնուհետեւ տեղափոխուած է Ֆրանսա, ուսանած է Փարիզի հեղինակաւոր Գեղեցիկ արուեստներու բարձրագոյն համալսարանին մէջ՝ լուսանկարչութեան բաժին։ Փոքր տարիքէն զբաղած է գեղանկարչութեամբ. անհատական ցուցահանդէսներով հանդէս եկած է Հայաստանի, Ռուսիոյ, Լեհաստանի եւ Ֆրանսայի տասնեակ ցուցասրահներու մէջ։

www.yerakouyn.com

Leave a Reply

Your email address will not be published.