Թրքական թերթը «Զանգեզուրի միջանցք»-ը անուանած է «Թուրանի ճանապարհ»

Թրքական իշխանամերձ «Sabah» թերթի կայքը հրապարակած է «Թուրանի ճանապարհը կու գայ. Թիւրքական պետութիւնները իրարու պիտի միացնէ» վերտառութեամբ յօդուած մը, ուր անդրադարձած է «Զանգեզուրի միջանցք»-ին՝ զայն անուանելով «Թուրանի ճանապարհ»: Այս մասին կը հաղորդէ Ermenihaber.am-ը։

Ըստ թրքական լրատուամիջոցին՝ Ղարաբաղի յաղթանակով Թուրքիոյ եւ Ասիոյ միջեւ բացուած է նոր միջանցք, որ իրարու պիտի կապէ 1.1 երրիլիոն տոլարի ՀՆԱ ունեցող թիւրքախօս երկիրները:

Ընդգծուած է, որ Թուրքիա-Ազրպէյճան առեւտրաշրջանառութիւնը կը կազմէ մօտ 4.5 միլիառ տոլար, եւ նպատակ կայ զայն հասցնելու մինչև 15 միլիառ տոլարի: Նշուած է, որ միջանցքի բացումով վերջ պիտի դրուին Վրաստանի եւ Իրանի տարածքով տարանցման վրայ կիրառուող սահմանափակումներուն:

Ըստ կայքի պնդումին՝ կը նախատեսուի, որ այդ ուղին պիտի բացուի այս տարի, իսկ անոր շահագործումէն ետք՝ Հարաւային Կովկասի մէջ հնարաւոր պիտի ըլլայ հիմք դնել տնտեսական համագործակցութեան:

Կրկին ընդգծուած է, որ «Զանգեզուրի միջանցք»-ը չինական «Մէկ գօտի, մէկ ճանապարհ» նախագիծի տեսանկիւնէն մեծ կարեւորութիւն ունի: Ըստ այդմ՝ երբ «միջանցք»-ը յանձնուի շահագործման, Ազրպէյճանի դիրքը, որ կը գտնուի Թուրքիոյ եւ Չինաստանի միջեւ, «Մէկ գօտի, մէկ ճանապարհ» նախագիծի տեսանկիւնէն պիտի ամրապնդուի, իսկ Զանգեզուրը կարեւոր այլընտրանքային ուղի կրնայ դառնալ «Մէկ գօտի, մէկ ճանապարհ» նախագիծին համար, որուն նշանակութիւնը ռուս-ուքրանական պատերազմէն ետք մեծցած է:

Yerakouyn.com 

Leave a Reply

Your email address will not be published.