«Արցախեան հիմնախնդիրը եւ Արցախի Հանրապետութեան արտաքին քաղաքականութիւնը» գիրքին շնորհանդէսը Արցախի մէջ

Ստեփանակերտի մէջ Յուլիս 6-ին կայացած է ԱՀ արտաքին գործոց նախարարութեան կողմէ հրատարակուած «Արցախեան հիմնախնդիրը եւ Արցախի Հանրապետութեան արտաքին քաղաքականութիւնը» գիրքին շնորհանդէսը: ԱՅս մասին կը հաղորդէ «Ապառաժ»-ը։

Գիրքի արցախեան շնորհանդէսին ներկայ եղած են ԱՀ Ազգային ժողովի նախագահ Արթուր Թովմասեանը, ԱՀ պետական նախարար Արտակ Բեգլարեանը, քաղաքական, հասարակական գործիչներ:

Գիրքի գլխաւոր խմբագիրը ԱՀ արտաքին գործոց նախարար, պ.գ.թ. Դաւիթ Բաբայեանն է: Իր խօսքին մէջ Դաւիթ Բաբայեան նշած է, որ գիրքին վրայ ԱՀ ԱԳն աշխատակազմը աշխատած է մօտ մէկ տարի: «Աշխատութիւնը օգտակար պիտի ըլլայ հասարակական, քաղաքական, գիտակրթական, տեղեկատուական դաշտի մէջ: Հակառակորդին կողմէ տեղեկատուական պատերազմը կը շարունակուի, ալ աւելի պիտի զօրանայ մօտակայ տարիներուն ընթացքին, եւ մենք պէտք է պատրաստ ըլլանք ըստ ամենայնի պահպանելու եւ պաշտպանելու մեր դիրքերը»,- ըսած է Դաւիթ Բաբայեան:

Գիրքը բաղկացած է երեք հիմնական մասէ՝ առաջինը պատմական հակիրճ տեղեկութիւններ են, երկրորդ մասը կը վերաբերի ազրպէյճանա-ղարաբաղեան հակամարտութեան, անոր կարգաւորման գրոծընթացին, երրորդ մասով ներկայացուած են ԱՀ արտաքին քաղաքականութեան առանցքային հասկացութիւնները:

Աշխատութեան մասին կարծիքներով կիսուած են ԱՀ ԱԺ նախագահ Արթուր Թովմասեանը, ԱՀ պետական նախարար Արտակ Բեգլարեանը, պ.գ.դ., փրոֆէսըր Վալերի Աւանէսեանը, ԱՀ նախագահի խորհրդական Լուսինէ Ղարախանեանը, ԱՀ նախագահի տեղեկատւութեան վարչութեան պետ Վահրամ Պօղոսեանը:

Աշխատութիւնը լոյս տեսած է բարեգործական միջոցներով, շուտով լոյս պիտի տեսնէ ռուսերէն տարբերակը, կը նախատեսուի նաեւ հրապարակել անգլերէն, ֆրանսերէն, գերմաներէն եւ սպաներէն տարբերակները:

Yerakouyn.com

Leave a Reply

Your email address will not be published. Required fields are marked *