«Թրքական աշխարհը կապուած է մէկ մարմինի գործարաններու պէս» կ՛ըսէ Չաւուշօղլու

Թուրքիոյ արտաքին գործոց նախարար Մեւլութ Չաւուշօղլու ընդգծած է թրքական երկիրներու միասնութեան անհրաժեշտութիւնը վերջին անկարգութիւններուն ժամանակ Ղազախստանին աջակցելու հարցին մէջ` ընդգծելով, որ Թուրքիան վճռականօրէն կ՛աջակցի այդ երկրին:

«Իբրեւ թրքական պետութեանց ընտանիք` մենք այս դժուար պահուն կ՛աջակցինք մեր ղազախ եղբայրներուն եւ համերաշխ ենք անոնց հետ», ըսած է Չաւուշօղլու` խօսք արտասանելով Թրքական կազմակերպութեան անդամ եւ դէտ երկիրներու արտաքին գործոց նախարարներու` Ղազախստանի իրադարձութիւններու գնահատման յատկացուած առցանց արտակարգ հանդիպումի ժամանակ:

Ըստ «Հիւրրիեթ»-ի, ան նաեւ նշած է, որ Անգարան մտահոգութեամբ կը հետեւի Ղազախստանի իրադարձութիւններուն, որ թրքական աշխարհը մեծ ընտանիք է, որուն կապուած են մէկ մարմինի գործարաններու պէս:

Չաւուշօղլուն վստահեցուցած է, որ թուրք ժողովուրդները իրենց ամբողջ ներուժով պիտի աջակցին Ղազախստանին եւ համակողմանի աջակցութիւն պիտի տրամադրեն:

«Իբրեւ ազգ` մենք շատ տխուր ենք Ղազախստանի մէջ տեղի ունեցող իրադարձութիւններուն համար, ինչպէս որ ամբողջ մարմինը կը տուժէ, երբ անոր մէկ մասը կը ցաւի: Կը մաղթենք Ալլահի ողորմածութիւնը զոհուածներուն, իսկ վիրաւորներուն` շուտափոյթ ապաքինում», ընդգծած է ան:

Միեւնոյն ժամանակ, Չաւուշօղլու աւելցուցած է, որ Անգարան ուրախ է, որ կացութիւնը կը վերահսկուի, եւ գոհ է Ղազախստանի մէջ նոր վարչապետի նշանակումէն, ինչպէս նաեւ ըսած է, որ Անգարան պիտի շարունակէ աշխատիլ Ղազախստանի հետ համագործակցութեամբ:

«Իբրեւ Թուրքիա` մենք սկիզբէն կապի մէջ եղած ենք Ղազախստանի իշխանութիւններուն հետ: Մեր հասարակութիւնը ուշադրութեամբ կը հետեւէր իրադարձութիւններու զարգացման, եւ մենք ազգովին մտահոգուած էինք: Այսուհետեւ, մեր ճամբուն վրայ ինչ ալ պատահի, մենք մեր բոլոր միջոցներով կ՛աջակցինք Ղազախստանին եւ պատրաստ ենք լարելու մեր բոլոր միջոցները», ըսած է ան:

https://www.aztagdaily.com/archives/534508 

Leave a Reply

Your email address will not be published. Required fields are marked *