Աշխարհը փոխեց վերաբերմունքը՝ տեսնելով, որ հայերը չեն պաշտպանում իրենց իրավունքը․ Կիրո Մանոյան

Հայաստանի իշխանությունների կեցվածքը պատերազմից հետո անցած մեկ տարվա ընթացքում, շատ երկրների մոտ ստեղծել է տրամադրություն, որ այդ հարցն իրենց շատ չի վերաբերվում. Եթե Հայաստանն իր շահերը չի պաշտպանում, մենք ինչու պետք է պաշտպանենք: Այս մասին, այսօր՝ նոյեմբերի 29-ին, Հայ Դատի հանձնախմբերի եւ գրասենյակների խորհրդաժողովի ժամանակ  ասաց ՀՅԴ Հայ դատի եւ քաղաքական հարցերի գրասենյակի ղեկավար Կիրո Մանոյանը:

Նա հիշեցրեց, որ դեռեւս 2009-ին, երբ ստորագրվեցին հայ-թուրքական արձանագրությունները, եւ այն ժամանկվա նախագահ Սերժ Սարգսյանը շրջագայում էր Սփյուռքի գաղթօջախներով, Հայ դատի Ամերիկայի հանձնախմբի ատենապետ Քեն Խաչիկյանը շատերի ներկայությամբ Սերժ Սարգսյանին ասել էր. «Ձեզ ո՞վ է իրավունք տվել մեր վաստակածը մսխելու»: «Այսօր էլ մենք ստիպված ենք, որպես Հայ դատի հանձնախմբերի ցանց, ասելու իշխանություններին, որ դուք չեք կարող, իրավունք չունեք հարվածելու ոչ միայն մեր այսօրվա անվտանգությանը, այլեւ մեր վաղվա իրավունքը: Այսօրվա մեր դժվարություններից մեկն այն է, որ ՀՀ իշխանությունների կեցվածքը եւ մեր կեցվածքը տարբեր են: Դրա համար մենք անհանգիստ ենք, որ Վաշինգտոնից մինչեւ Գերմանիա՝ դեսպաններ են նշանակված մարդիկ, որոնք դիվանագիտական ասպարեզում փորձ չունեն»,-ասաց Մանոյանը:

Նա նկատեց, որ եթե մինչեւ վերջերս Արցախի ճանաչման ուղղությամբ պետք է համոզեին մարդկանց, որ եթե չճանաչեք Արցախի անկախությունը, մարդկանց կյանքի ֆիզիկական սպառնալիք կա, հիմա արդեն համոզելու կարիք չկա, Ադրբեջանն ամեն օր դա ապացուցում է:

«Հայ դատի աշխատանքների համար կարեւոր է, որ այս իշխանությունները փոխվեն, որովհետեւ պարզ է, որ իրենք իրենց քաղաքականությունը դեպի դրականը փոխելու ոչ ունակություն ունեն, ոչ էլ ցանկություն.,-ասաց նա:

https://www.arfd.am/news/46528/?fbclid=IwAR3lDACDOgo8BnpzCAA2ftI9_gzDisZCS46Qx2J1UwftzUsBwyw8LJK5ipY 

Leave a Reply

Your email address will not be published. Required fields are marked *