Պահչելի Թուրքիոյ խորհրդարանին մէջ կը յայտարարէ. «ՕԹԱՆ-ի մէջ Անգարայի դէմ դաւեր կը նիւթեն»

Թուրքիոյ իշխող դաշինքի անդամ Ազգայնական շարժում կուսակցութեան ղեկավար Տեւլեթ Պահչելի ՕԹԱՆ-ի երկիրները մեղադրած է հակաթրքական դաշինք ստեղծելու մէջ: Այս մասին կը հաղորդէ «Հիւրրիեթ Տէյլի Նիուզ»-ը:

«Յունաստան Թուրքիոյ դէմ ճակատ կը ստեղծէ` դաշինքներ կնքելով Եգէական ծովուն եւ Արեւելեան Միջերկրականի մէջ… Արդեօք այս համաձայնութիւնը (Ֆրանսայի եւ Յունաստանի միջեւ 28 սեպտեմբեր 2021-ի, «Ա.») չի՞ հակասեր ՕԹԱՆ-ի սկզբունքներուն», խորհրդարանին մէջ իր խմբակցութեան առջեւ արտասանած խօսքին մէջ ըսած է Պահչելի:

Քաղաքական գործիչը նաեւ նշած է Միացեալ Նահանգներու եւ Յունաստանի միջեւ վերջերս կնքուած համաձայնագիրը, ըստ որուն, անոնք պաշտպանական համագործակցութիւնը կ՛երկարաձգեն 5 տարիով:

«Ես անկեղծօրէն կ՛ըսեմ ձեզի. ՕԹԱՆ-ի մէջ Թուրքիոյ դէմ դաւեր կը նիւթուին: Թուրքիոյ կը սպառնան. Միացեալ Նահանգներու արտաքին գործոց նախարարը Յունաստանը կոչած է շրջանին մէջ կայունութեան յենարան: Յունաստանը ունի վատ համբաւ եւ ճգնաժամային քաղաքականութիւն, որ պէտք է շտկել եւ կարգի բերել… Երբ մենք կը նայինք Ֆրանսայի, Յունաստանի եւ Միացեալ Նահանգներու համաձայնագիրներուն, յստակ կը դառնայ, որ Աթէնքի վարչակազմը աւելի թշնամական քաղաքականութիւն պիտի վարէ Եգէական եւ Միջերկրական ծովերուն մէջ», ըսած է Պահչելի:

https://www.aztagdaily.com/archives/526384 

Leave a Reply

Your email address will not be published. Required fields are marked *